මැදපෙරදිග ශ්රී ලාංකිකයන් ගැන දැන ගැනිමට හදිසි ඇමතුම් සේවාවක්
මැදපෙරදිග ශ්රී ලාංකිකයන් ගැන දැනගන්න හදිසි ඇමතුම් සේවාවක්
මැදපෙරදිග වෙසෙන ශ්රී ලංකිකයන්ට සහ මෙරට සිටින ඔවුන්ගේ ඥාතීන්ට අවශ්ය ඕනෑම තොරතුරක් ලබා ගැනීමට පැය 24 පුරා ක්රියාත්මක හදිසි ඇමතුම් සේවාවක් ක්රියාත්මක කිරීමට විදේශ කටයුතු අමාත්යාංශය පියවර ගෙන ඇත.
මැදපෙරදිග කලාපයේ ඇතිවී තිබෙන යුදමය තත්ත්වය මෙන්ම පවතින ආරක්ෂක තත්ත්වය සමීපව නිරීක්ෂණය කරමින් එම කලාපයේ ජීවත්වන සහ සේවය කරන මිලියනයක පමණ ශ්රී ලාංකිකයන්ගේ ආරක්ෂාව සහ යහපැවැත්ම උදෙසා මේ සේවාව ක්රියාත්මක කරන බව විදේශ කටයුතු අමාත්යාංශය පවසයි.
පවතින කලාපීය අස්ථාවරත්වය සැලකිල්ලට ගනිමින් මැදපෙරදිග සිටින ශ්රී ලාංකික පුරවැසියන්ට ඉතාමත් සුපරීක්ෂාකාරීව කටයුතු කරන ලෙස තරයේ උපදෙස් දී තිබෙන අතර, විශ්වාසදායක දේශීය මාධ්ය සහ සත්කාරක රටේ නිල නිවේදන අනුව කටයුතු කිරීම, අත්යවශ්ය නොවන සංචාර සහ විශාල මහජන රැස්වීම්වලට සහභාගී වීමෙන් වැළකීම, ළඟම ඇති ශ්රී ලංකා රාජ්යතාන්ත්රික දූත මණ්ඩලය සමඟ නිරන්තරයෙන් සම්බන්ධතා පැවැත්වීම, ජංගම දුරකතන ආරෝපණය (Charge) කර තබාගැනීම, සෑමවිටම වලංගු හැඳුනුම්පත් හා ලේඛන රැගෙන යෑම ආදිය සම්බන්ධයෙන් අවධානය යොමු කරන ලෙස විදේශ අමාත්යාංශය ඉල්ලීමක් කරයි.
අවශ්ය අවස්ථාවලදී සහාය දීමට කලාපයේ සියලුම ශ්රී ලංකා රාජ්යතාන්ත්රික දූත මණ්ඩල පැය 24 පුරා ක්රියාත්මක හදිසි දුරකතන අංක සක්රිය කර ඇති අතර, ශ්රී ලංකාවේ පවුල් විසින් සිදු කරන විමසීම් සඳහා පැය 24 පුරාම හදිසි ඇමතුම් අංක ද ක්රියාත්මකව පවතියි. විදේශ කටයුතු අමාත්යාංශයේ කොන්සියුලර් කටයුතු අංශය: +94742595546, ශ්රී ලංකා විදේශ සේවා නියුක්ති කාර්යාංශය (SLBFE): +94719802822 සහ ක්ෂණික දුරකතන අංකය 1989 ඒ අතර වෙයි.
විදේශ කටයුතු අමාත්යාංශය මේ තත්ත්වය නිරීක්ෂණය කිරීම සහ අවශ්ය පරිදි වැඩිදුර යාවත්කාලීන කිරීම් නිකුත් කිරීම අඛණ්ඩව සිදු කරගෙන යන බව ද කියා සිටියි.
About The Author
