​ශ්‍රී ලංකා පාපන්දු පුහුණුකරු අබ්දුල්ලා අල් මුතයිරිට මාස 6ක තහනමක් සහ ඩොලර් 10,000ක දඩයක්!

ඉන්දියාවේ හිටපු යුරෝපීය පුහුණුකරුවෙකුට විනය විරෝධී හැසිරීමක් සම්බන්ධයෙන් ඉතා සුළු දඬුවමක් ලබා දී තිබියදී, තමන්ට මාස හයක තහනමකට සහ ඇමරිකානු ඩොලර් 10,000ක දඩයකට මුහුණ දීමට සිදුව ඇත්තේ මන්දැයි ප්‍රශ්න කරමින්, ශ්‍රී ලංකා ජාතික පාපන්දු පුහුණුකරු අබ්දුල්ලා අල් මුතයිරි (Abdullah Al Mutairi) දකුණු ආසියානු පාපන්දු සම්මේලනය (SAFF) දෙබිඩි පිළිවෙතක් අනුගමනය කරන බවට චෝදනා කර තිබේ.
බදාදා පැවැති SAFF ශූරතාවලියේදී බංග්ලාදේශය හමුවේ ශ්‍රී ලංකාව ගෝල 4-0ක් ලෙස පරාජය වීමෙන් පසුව අදහස් දක්වමින් අල් මුතයිරි චෝදනා කළේ, තමා අරාබි ජාතිකයෙකු වීම නිසා අසාධාරණ ලෙස ඉලක්ක කර ගන්නා බවයි.
”ඔහු යුරෝපීයයෙක්, ඔහු ඉන්දියාවේ පුහුණුකරු, කාටද ඔහුව නවත්වන්න පුළුවන්?” යනුවෙන් අල් මුතයිරි පැවසුවේ හිටපු ඉන්දීය ජාතික කණ්ඩායමේ පුහුණුකරු ඉගෝර් ස්ටිමැක් (Igor Stimac) ගැන සඳහන් කරමිනි.
2023 SAFF ශූරතාවලිය අතරතුර තරග නිලධාරීන්ට එරෙහිව අසභ්‍ය වචන භාවිත කිරීම හේතුවෙන් ඩොලර් 500ක දඩයකට ලක් වූ ස්ටිමැක්ගේ තත්ත්වය සමඟ ශ්‍රී ලංකා පුහුණුකරුවා තම තත්ත්වය සංසන්දනය කළේය.
යුරෝපීය, ඇමරිකානු හෝ රුසියානු පුහුණුකරුවෙකුට එරෙහිව SAFF සම්මේලනය මෙවැනි විනය ක්‍රියාමාර්ගයක් ගනීවිදැයි අල් මුතයිරි ප්‍රශ්න කළේය.
”SAFF සම්මේලනයට අරාබි ජාතිකයින්ට එරෙහි වර්ගවාදය පිළිබඳ ගැටලුවක් ඇති බව මම විශ්වාස කරනවා,” ඔහු වාර්තාකරුවන්ට පැවසීය.
අල් මුතයිරිට අනුව, SAFF නීති දෙපාර්තමේන්තුව අඟහරුවාදා මධ්‍යම රාත්‍රියේ පමණ ඔහුට විද්‍යුත් තැපෑලක් (email) එවා ඇති අතර, භූතානය සමඟ 2-2ක් ලෙස ජය පරාජයෙන් තොරව අවසන් වූ තරගයෙන් පසු ඔහු කළ ප්‍රකාශයන් සම්බන්ධයෙන් පැනනැගී ඇති විනය චෝදනාවලට ප්‍රතිචාර දැක්වීමට ඔහුට ලබා දී ඇත්තේ පැය 10ක කාලයක් පමණි.
මූලික වටයේ තරග අතරතුර තීරකවරුන්ගේ තීරණ විවේචනය කිරීම සහ වීඩියෝ සහකාර තීරක (VAR) තාක්ෂණය ඉල්ලා සිටීම පිළිබඳව එම විද්‍යුත් තැපෑලෙහි සඳහන් කර ඇති බව ඔහු පැවසීය.
”මම කිසිම අසභ්‍ය වචනයක් භාවිතා කළේ නැත්නම්, ඇයි ඔබ මට මධ්‍යම රාත්‍රියේ එය එව්වේ?” යනුවෙන් ප්‍රශ්න කළ ඔහු, පසුදා උදෑසන වන තෙක් සම්මේලනයට බලා සිටීමට නොහැකි වූයේ මන්දැයි විමසීය.
2023 SAFF ශූරතාවලිය අතරතුර ස්ටිමැක් පාකිස්තාන ක්‍රීඩකයෙකු පන්දුව විසි කිරීමට (throw-in) උත්සාහ කිරීමේදී ශාරීරිකව බාධා කරමින් ගැටුමක් ඇති කළ සිදුවීමක් ද කුවේට් ජාතික පුහුණුකරුවා මෙහිදී සිහිපත් කළේය.
හිටපු ඉන්දීය පුහුණුකරුට එරෙහිව ගත් විනය ක්‍රියාමාර්ගයට වඩා බෙහෙවින් දැඩි දඬුවමක් තරග නිලධාරීන් විවේචනය කිරීම නිසා තමන්ට හිමිවිය හැක්කේ මන්දැයි අල් මුතයිරි ප්‍රශ්න කළේය.
2021 ශූරතාවලියේදී තමා නේපාලයේ පුහුණුකරු ලෙස කටයුතු කරන සමයේදී ද SAFF සම්මේලනය තමන්ට අසාධාරණ ලෙස සැලකූ බවට ඔහු වැඩිදුරටත් චෝදනා කළේය.
”මම SAFF කලාපයට පැමිණෙන අවසන් අවස්ථාව මෙයයි,” යනුවෙන් ප්‍රකාශ කළ ඔහු, එම සංවිධානය අරාබි පුහුණුකරුවන්ට අකමැති බව කියා සිටියේය.
විනය නිවේදනයට කරුණු 14කින් යුත් ප්‍රතිචාරයක් තමා ඉදිරිපත් කර ඇති බවත්, තම චෝදනා සනාථ කරන සාක්ෂි ප්‍රසිද්ධියේ නිකුත් කරන බවත් අල් මුතයිරි පැවසීය.
බංග්ලාදේශය හමුවේ ලැබූ ගෝල 4-0ක පරාජයත් සමඟ 2026 SAFF ශූරතාවලියේ ශ්‍රී ලංකා ගමන අවසන් වූ අතර, ‘A’ කාණ්ඩයේ ශූරයන් ලෙස බංග්ලාදේශය අවසන් පූර්ව වටයට සුදුසුකම් ලැබීය.