”ඥානසාර හිමිගේ වසර 6ක සිරදඬුවම නීතිවිරෝධීයි”: හිටපු අග්‍රවිනිශ්චයකාර සරත් එන්. සිල්වා!
පූජ්‍ය ගලගොඩඅත්තේ ඥානසාර හිමියන්ට නියම කරන ලද වසර හයක සිරදඬුවම නීතියෙන් අවසර දී ඇති උපරිම දඬුවම ඉක්මවා යන බව පවසමින්, එම දඬුවමේ නීත්‍යානුකූලභාවය පිළිබඳව හිටපු අග්‍රවිනිශ්චයකාර සරත් එන්. සිල්වා මහතා ප්‍රශ්න කර ඇත.
සඳුදා (12) කොළඹ සමස්ත ලංකා බෞද්ධ මහා සම්මේලනය විසින් සංවිධානය කරන ලද සම්මේලනයක් අමතමින් සරත් එන්. සිල්වා මහතා පැවසුවේ අදාළ දඬුවම සම්පූර්ණයෙන්ම නීති විරෝධී බවයි.
”ඥානසාර හිමියන්ට නියම කළ දඬුවම සම්පූර්ණයෙන්ම නීති විරෝධීයි. මෙය ඉතා අසාමාන්‍ය තත්ත්වයක්,” යැයි සරත් එන්. සිල්වා මහතා පැවසීය.
”අපරාධ නඩුව විභාග කළ මහේස්ත්‍රාත්වරයා අභියාචනාධිකරණයේ සභාපති විනිසුරු ප්‍රීති පද්මන් සුරසේන මහතා වෙත ලිපියක් යොමු කරමින් කියා සිටියේ මෙවැනි සිදුවීමක් තමන්ගේ අධිකරණය තුළ සිදුවූ බවත්, තමන්ගේ දඬුවම් නියම කිරීමේ බලතල සීමිත බැවින් වඩාත් බරපතල දඬුවමක් ලබාදීම සඳහා මෙම කරුණ අභියාචනාධිකරණය වෙත යොමු කරන බවත්ය.”
”ගැටලුව තියෙන්නේ අන්න එතැනයි. මෙහි ඇති නීතිමය තත්ත්වය කුමක්ද? අධිකරණයට අපහාස කිරීම සම්බන්ධයෙන් වන දඬුවම වන්නේ රුපියල් 1,500කට නොවැඩි දඩයක් හෝ මාස 18කට නොවැඩි කාලයක ලිහිල් සිරදඬුවමකි. ඒ කියන්නේ අවුරුදු එකහමාරක් විතරයි,” යැයි ඔහු පැවසීය.
”නමුත් නීතියෙන් මාස 18ක් පමණක් පනවා ඇති අවස්ථාවක, ප්‍රීති පද්මන් සුරසේන මහතා විසින් වසර හයක සිරදඬුවමක් නියම කර තිබෙනවා. එම ප්‍රතිපාදනය අදාළ වන්නේ අභියාචනාධිකරණයට කරනු ලබන අපහාසයන්ට පමණයි. අනෙක් කරුණු සම්බන්ධයෙන් එවැනි ප්‍රතිපාදනයක් නැහැ,” යැයි සරත් එන්. සිල්වා මහතා චෝදනා කළේය.
හිටපු ජනාධිපති මෛත්‍රීපාල සිරිසේන මහතා විසින් මීට පෙර ඥානසාර හිමියන්ට ලබාදුන් ජනාධිපති සමාව සාධාරණීකරණය කරමින් ද හිටපු අග්‍රවිනිශ්චයකාරවරයා අදහස් දැක්වීය.
මහා සංඝරත්නය, දේශපාලනඥයන් සහ සංවිධාන කිහිපයක නියෝජිතයින්ගේ සහභාගීත්වයෙන් පැවැති ‘බුදුදහම සහ සිංහල බෞද්ධ උරුමය සුරැකීමේ ජාතික සම්මේලනය’ අතරතුරදී සරත් එන්. සිල්වා මහතා මෙම අදහස් පළ කළේය.
About The Author
