හිටපු ප්‍රථම කාන්තාව ශිරන්ති රාජපක්ෂ අල්ලස් කොමිසම මගින් අත්අඩංගුවට!
හිටපු ජනාධිපති මහින්ද රාජපක්ෂ මහතාගේ බිරිඳ වන හිටපු ප්‍රථම කාන්තාව ශිරන්ති රාජපක්ෂ මහත්මිය අල්ලස් හෝ දූෂණ චෝදනා විමර්ශන කොමිෂන් සභාවේ (CIABOC) නිලධාරීන් විසින් අත්අඩංගුවට ගෙන ඇත.
ශිරන්ති රාජපක්ෂ මහත්මිය අත්අඩංගුවට ගෙන ඇත්තේ කිරුළපන, පූර්වාරාම පාරේ පිහිටි ඇයගේ නිවසේදීය.
අල්ලස් කොමිෂන් සභාව සඳහන් කළේ, පැය දෙකකට ආසන්න කාලයක් ඇගෙන් ප්‍රකාශයක් සටහන් කර ගැනීමෙන් අනතුරුව මෙම අත්අඩංගුවට ගැනීම සිදු කළ බවයි.
’සිරිලිය සවිය’ අරමුදලට සම්බන්ධ ගිණුමක සිදුවී ඇති මූල්‍ය අක්‍රමිකතා සහ ගනුදෙනු සම්බන්ධයෙන් එල්ල වී ඇති චෝදනා මත ඇය මෙසේ අත්අඩංගුවට ගෙන තිබේ.
මේ අතර, සඳුදා (05) රාත්‍රියේ නැවත ශ්‍රී ලංකාවට පැමිණි ශිරන්ති රාජපක්ෂ මහත්මියට ඔක්තෝබර් 13 වන දින මූල්‍ය අපරාධ විමර්ශන කොට්ඨාසය (FCID) හමුවේ පෙනී සිටින ලෙස දැනුම් දී තිබූ බව පොලිසිය පැවසීය.
හිටපු ප්‍රථම කාන්තාව මැලේසියාවේ සිට පැමිණි ගුවන් යානයකින් මෙරටට පැමිණියාය.
වෛද්‍ය ප්‍රතිකාර සඳහා ඇය සැප්තැම්බර් 16 වන දින අලුයම සිංගප්පූරුව බලා පිටත්ව ගොස් තිබුණි.
රෝගාතුර වූ බවට වාර්තා වීමෙන් පසු සැප්තැම්බර් 15 වන දින රාජපක්ෂ මහත්මිය කොළඹ පෞද්ගලික රෝහලකට ඇතුළත් කර තිබූ අතර, වාර්තාවලට අනුව ඇය රෝහලේ සිට කෙළින්ම ගුවන්තොටුපළ වෙත කැඳවාගෙන ගොස් තිබේ.
මේ අතර, සිරිලිය සවිය සංවිධානයේ මූල්‍ය කටයුතු සම්බන්ධයෙන් සිදුකෙරෙන විමර්ශනයකට අදාළව තමන් අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලමින් ශිරන්ති රාජපක්ෂ මහත්මිය වෙනුවෙන් පෙනී සිටින නීතිඥයින් සඳුදා (05) මාලිගාකන්ද මහේස්ත්‍රාත් අධිකරණය හමුවේ අපේක්ෂිත ඇප අයදුම්පතක් ද ගොනු කර තිබුණි.
About The Author
