​50%ක ආනයන බදු අධිභාරය දෙසැම්බර් 31 දක්වා දීර්ඝ කෙරේ: වාහන මිල ගණන් ලක්ෂ ගණනින් ඉහළ යන ලකුණු

අගෝස්තු 15 වැනිදායින් අවසන් වීමට නියමිතව තිබූ 50%ක ආනයන බදු අධිභාරය ලබන දෙසැම්බර් 31 දක්වා දීර්ඝ කිරීමට රජය පියවර ගෙන තිබේ.

මෙම තීරණයත් සමඟ ඉදිරියේදී මෙරට වාහන මිල ගණන් සැලකිය යුතු ලෙස ඉහළ යනු ඇති බව ශ්‍රී ලංකා වාහන ආනයනකරුවන්ගේ සංගමය පවසයි.

එම සංගමයේ සභාපති ප්‍රසාද් මානගේ මහතා සඳහන් කළේ, මෙම බදු දීර්ඝ කිරීම හේතුවෙන් ප්‍රදර්ශනාගාරවල පවතින වාහනවල මිල ගණන් පහත පරිදි ඉහළ යා හැකි බවයි.

සුසුකි වැගන් ආර් (Suzuki Wagon R)- රුපියල් 500,000 කින් පමණ

ටොයෝටා රයිස් (Toyota Raize)- රුපියල් මිලියන 1 කින්

හොන්ඩා වෙසල් (Honda Vezel)- රුපියල් මිලියන 1.5 සිට 2 දක්වා

ඩබල් කැබ් (Double Cab)- රුපියල් මිලියන 2 සිට 2.5 දක්වා

ටොයෝටා ප්‍රාඩෝ (Toyota Prado)- රුපියල් මිලියන 3 කින්

ලෑන්ඩ් කෲසර් (Land Cruiser)- රුපියල් මිලියන 5 කින්

දැනට වෙළඳපොළේ පවතින වාහනවලින් 90%ක්ම මැයි 15 දිනට පෙර විවෘත කරන ලද ණයවර ලිපි යටතේ ගෙන ආ ඒවා බැවින් ඒවා මෙම අධිභාරයෙන් නිදහස් වන බවත්, එහෙත් මැයි 15න් පසුව විවෘත කරන ලද ණයවර ලිපි යටතේ ආනයනය කෙරුණු වාහන මේ වන විට නිදහස් කරගැනීම ආරම්භ කර ඇති බැවින් එම වාහන සඳහා මෙම ඉහළ බද්ද අදාළ වන බවත් ඔහු පැහැදිලි කළා.

දිගින් දිගටම අධිභාර පැනවීමෙන් වෙළඳපොළ තුළ දැඩි උච්ඡාවචනයන් ඇති වන බව පෙන්වා දුන් සභාපතිවරයා, නිතර නිතර මිල ගණන් වෙනස් කරනවා වෙනුවට ස්ථාවර බදු ප්‍රතිපත්තියක්, ණයවර ලිපි පාලනයක් හෝ වෙනත් විකල්ප ක්‍රමවේද හරහා අධික ලෙස මිල ඉහළ යාමකින් තොරව ආනයනය සීමා කර වෙළඳපොළ ස්ථාවර කිරීමට රජයට පියවර ගත හැකි බව වැඩිදුරටත් අවධාරණය කලේය.