ආනයන මුවාවෙන් ඩොලර් මිලියන 715ක් පිටරට පැන්නීම,CIDයෙන් COPF හමුවේ මහා මූල්ය වංචාවක තොරතුරු හෙළි වෙයි
ජුනි මාසයට සාපේක්ෂව ජූලි මාසයේදී විදෙස් සංචිතවල සුළු වැඩිවීමක්
විදේශ රටවලින් භාණ්ඩ ආනයනය කරන මුවාවෙන් 2023 සිට 2026 මාර්තු දක්වා කාලය තුළ අමෙරිකානු ඩොලර් මිලියන 715ක් රටින් පිට කර ඇතැයි, අපරාධ පරීක්ෂණ දෙපාර්තමේන්තු භාර ජ්යෙෂ්ඨ නියෝජ්ය පොලිස්පති නීතිඥ අසංක කරවිට මහතා පාර්ලිමේන්තුවේ රාජ්ය මුදල් කාරක සභාව හමුවේ අනාවරණ කළේය.
මෙරට ප්රධාන බැංකු 13ක ඇති බැංකු ගිණුම් 227ක් සම්බන්ධ කරගෙන සමාගම් 105ක් මඟින් මුදල් පිටකිරීම සිදුකර ඇති බව සඳහන් කළ අසංක කරවිට මහතා එම සමාගම් 105 තුළ අධ්යක්ෂවරු ලෙස සිටියේ එකම පුද්ගලයින් 55 දෙනෙක් බවද හෙළි කළේය.
රුපියල් බිලියන 214.7ක මුදලක් එසේ පිටකර ඇති බවත් එම මුදල ආසන්න වශයෙන් අමෙරිකානු ඩොලර් මිලියන 715කට අධික බවද අසංක කරවිට මහතා පෙන්වා දුන්නේය. මේ ආකාරයට ඩුබායි හී රැඳී සිටින මත්ද්රව්ය ජාවාරම්කරුවන්ට මත්ද්රව්ය ජාවාරමෙන් උපයා ගත් මුදල් පවා ඩුබායි වෙත යවා ඇති බවද අනාවරණය වී ඇතැයි අසංක කරවිට මහතා මෙහිදී හෙළි කළේය.
මේ වන විට ඊට අදාළව පුළුල් විමර්ශන ක්රියාවලියක් ආරම්භ කර ඇති බව පෙන්වා දුන් අසංක කරවිට මහතා භාණ්ඩ ආනයනය සිදු කරන බවට හඟවා විදේශ රටවලට මුදල් ප්රේෂණය සිදුකර භාණ්ඩ ආනයනය කර නැති බවද අනාවරණය කළේය.
ශ්රී ලංකා රේගුව පොලිස්පති අමතා ඒ සම්බන්ධයෙන් වාර්තා තුනක් 2026 ජනවාරි 20, පෙබරවාරි 23 සහ මාර්තු 06 දින ඉදිරිපත් කර ඇති බවද සඳහන් කළේය.
රාජ්ය මුදල් කාරක සභාව එහි සභාපති පාර්ලිමේන්තු මන්ත්රී ආචාර්ය හර්ෂ ද සිල්වා මහතාගේ ප්රධානත්වයෙන් පාර්ලිමේන්තුවේදී පෙරේදා (21) රැස්විය. කාරක සභාව විසින් කළ ලිඛිත දැනුම් දීමකට අනුව ජ්යෙෂ්ඨ නියෝජ්ය පොලිස්පති නීතිඥ අංසක කරවිට මහතා පෙනී සිටියේය. භාණ්ඩ ආනයනය කරන මුවාවෙන් මෙරට ඇති ඩොලර් පිටරටට පැන්නීම සම්බන්ධයෙන් වූ දීර්ඝ හෙළි කිරීමක් ඔහු එහිදී කාරක සභාව හමුවේ ඉදිරිපත් කළේය.
“පළමු වැනි වාර්තාව තුළ 2026 ජනවාරි 20 තුළ ආයතන 89ක් මේ ආකාරයට TT වලින් භාණ්ඩ ආනයනය කර ඇති නමුත් කිසිදු භාණ්ඩයක් මේ වෙනතුරු රටට රැගෙන පැමිණ නොමැති බවටත් ඒ වගේම 2026.02.03 වාර්තාව තුළින් එවැනි ආයතන හතරකුත් 2026.03.06 අදාළව එවැනි ආයතන 12ක් සම්බන්ධයෙනුත් වාර්තාවක් ඉදිරිපත් කළා.
සම්පූර්ණ ඒ වාර්තාව අනුව ගත්තොත් සමාගම් 105ක් ඒකට සම්බන්ධ වෙලා තිබ්බා. ඒ සමාගම් 105ට අදාළව රුපියල් බිලියන 214.7ක් දළ වශයෙන් අෙමරිකන් ඩොලර් මිලියන 715කට අධික මුදලක් TT මුදල් විදිහට මුදල් ප්රමාණයක් විදේශගත කරලා තිබෙනවා. ඒ විදේශගත කරපු මුදල්වලට කිසිදු භාණ්ඩයක් මෙරටට ගෙනාවේ නැහැ කියලා තමයි එම වාර්තාව තුළ සඳහන් වුණේ. “යැයිද කරවිට මහතා සඳහන් කළේය.
“ඒ සම්බන්ධව අපරාධ පරීක්ෂණ දෙපාර්තමේන්තුවේ FCID මඟින් විමර්ශනයක් ආරම්භ කළා. ඒ විමර්ශනයේදී අනාවරණය වෙනවා මේකට මීට සම්බන්ධ සමාගම් 105. ඒ සමාගම් 105 අධ්යක්ෂකවරුන් හා සමාගම් ලේකම්වරුන් සිටින සංඛ්යාව අපි පරීක්ෂාවට ලක් කරලා මේ සමාගම් 105 තුළම මේ සඳහා පුද්ගලයෝ 55 දෙනෙක් තමයි සම්බන්ධ වෙලා හිටියේ. එතකොට මේ සඳහා බැංකු ගිණුම් 227ක් සම්බන්ධ කරගෙන තිබ්බා. අෙමරිකන් ඩොලර් මිලියන 715කට ආසන්න මුදලක් TT 24300කට ආසන්න TT සංඛ්යාවක් යොදලා තිබ්බා. මෙය 2023 ජනවාරි පළවෙනිදා සිට 2026 මාර්තු මාසේ දක්වා වන කාලය සඳහා තමයි මේ ආකාරයකට වාර්තාව ඉදිරිපත් වුණේ“ යැයිද අසංක කරවිට මහතා පැවසීය.
“මේ සම්බන්ධව දීර්ඝ ලෙස පරීක්ෂා කරනකොට ලංකාවේ ප්රධාන බැංකු 13ක් මීට සම්බන්ධ වෙලා තිබ්බා. සියලුම රාජ්ය සහ පෞද්ගලික බැංකු 13ක්. මේ සම්බන්ධව දීර්ඝ ලෙස පරීක්ෂා කිරීමේදී මීට අදාළව එක සමාගමක් අපි හඳුනා ගත්තා. මේ අදාළ TT යොමු කරන සමාගම් අතුරින්. ඒ සමාගම අතුරින් එක සමාගමක ඉන්න පුද්ගලයෙක් මේ වෙනකොට අත්අඩංගුවට ගෙන අධිකරණ නඩු කටයුත්තක් සිදුවෙනවා.
ඔහු දැනට රක්ෂිත බන්ධනාගාරගතවී ඉන්නවා. ඔහු සමාගම් 43කට සම්බන්ධ වෙනවා. ඒ සමාගම්වල අයිතිකරුවෙක් විදිහට ඉදිරිපත් වෙනවා. ඔහුගේ ඒ සමාගම් 43 සම්බන්ධයෙන් පරීක්ෂා කරනකොට ඔහු අමෙරිකන් ඩොලර් මිලියන 43ක මුදල් ප්රමාණයක් මෙම කාල වකවානුව තුළ TT විදිහට යොමු කරලා තිබෙනවා. ඒ පුද්ගලයා සම්බන්ධයෙන් දීර්ඝ ලෙස විමර්ශනයක් කරන අවස්ථාවේදී ඔහු ලංකාවේ තැරව්කරුවන්ගෙන් මුදල් ලබාගෙන ඒ තැරව්කරුවන්ගෙන් අවශ්ය කරන ලිපිලේඛන ව්යාජ ලෙස සකස් කරලා බැංකුවලට ඉදිරිපත් කරලා තමයි TT විදිහට ඉදිරිපත් කරන්නේ. උදාහරණයක් විදිහට කිව්වොත් එහෙම ඉන්වොයිස් එකක් සකස් කරන්නේ ඔහුගේ ඒ අදාළ තැරව්කරු ඔහුගේ කාමරවල තියෙන පරිගණකවලින් කූට ව්යාජ ලෙස ඉන්වොයිස් එකක් සකස් කරලා බැංකුවලට ඉදිරිපත් කරලා සමහර බැංකුවල නිලධාරීන්ගේ සහයෝගය ඇතිව තමයි මේ කටයුතු සිදු කරලා තිබුණේ.
මේ සම්බන්ධයෙන් දීර්ඝ විමර්ශන සිදුකරන් යනකොට ඩුබායි රාජ්යයේ සිට මත්ද්රව්ය ජාවාරමට සම්බන්ධ එරට රැඳී සිටින ප්රබල මත්ද්රව්ය ජාවාරම්කරුවෙක්ගේ මුදල් මේ ක්රමය යටතේ ඩුබායි රාජ්යයට යොමු කරලා තිබෙන බවටත් විමර්ශනයේදී අනාවරණය කරගත්තා. ඊට අදාළව ඩුබායි රාජ්යයේ සිටින ප්රධාන සැකකරුවන් තිදෙනාගෙන් දෙදෙනෙක් පසුගිය කාල වකවානුව තුළදී ඉන්ටර්පෝල් හරහා ඔවුන් මෙරටට ගෙන්වා ගැනීමට හැකියාවක් ලැබිලා දැනට ඔවුන් දෙදෙනා රක්ෂිත බන්ධනාගාරගත කර සිටිනවා. “ යැයිද අසංක කරවිට මහතා පැවසීය.
About The Author
