රුමේෂ් තරංග ලෝක ශ්‍රේණිගත කිරීම්හි 2වැනි ස්ථානයට

ශ්‍රී ලංකා මලල ක්‍රීඩා ඉතිහාසයට අලුත් පිටුවක් එකතු කරමින්, ලෝක මලල ක්‍රීඩා සංගමය අද (17) ප්‍රකාශයට පත් කළ නවතම හෙල්ල විසිකිරීමේ ලෝක ශ්‍රේණිගත කිරීම්වල 02 වැනි ස්ථානය දිනා ගැනීමට ශ්‍රී ලංකාවේ සුපිරි ක්‍රීඩක රුමේෂ් තරංග සමත්ව තිබේ.

මීට පෙර ඔහු පසුවූයේ මෙම ලැයිස්තුවේ 03 වැනි ස්ථානයේය.

ඊයේ (16) චෙක් ජනරජයේ පැවැති සුප්‍රසිද්ධ ‘ඔස්ට්‍රාවා ගෝල්ඩන් ස්පයික්’මලල ක්‍රීඩා ශූරතාවලියේදී ප්‍රථම ස්ථානය දිනා ගනිමින් මව්බිමට අතිදැවැන්ත කීර්තියක් අත්කරදීමට රුමේෂ් සමත් විය.

එම විශිෂ්ට ජයග්‍රහණයත් සමඟ ඔහුගේ ශ්‍රේණිගත කිරීම් ලකුණු ප්‍රමාණය 1,333ක් දක්වා ඉහළ ගියේය.

පෙර ශ්‍රේණිගත කිරීම්වලදී රුමේෂ් තරංග පසුවූයේ එවකට දෙවැනි ස්ථානයේ සිටි ග්‍රෙනඩා රාජ්‍යයේ ඇන්ඩර්සන් පීටර්ස්ට (ලකුණු 1,326) වඩා ලකුණු 2ක ඉතා සුළු පරතරයකින් පසුපසිනි.

නමුත් ඊයේ ලැබූ ජයග්‍රහණයත් සමග ඇන්ඩර්සන් පීටර්ස් අභිබවා යමින් දෙවැනි ස්ථානය තමන් සතු කරගැනීමට රුමේෂ්ට හැකිවිය.

මෙම ලැයිස්තුවේ ප්‍රථම ස්ථානය තවමත් ලකුණු 1,360ක් ලබා සිටින ජර්මානු ක්‍රීඩක ජූලියන් වෙබර් විසින් හිමිකරගෙන සිටියි.