ලෝක වෙළෙඳපොළේ කෝපි මිල ශීඝ්‍රයෙන් ඉහළට

දේශගුණික විපර්යාස, භූදේශපාලනික ආතතීන් සහ බදු ප්‍රතිපත්ති හේතුවෙන් ලෝක වෙළෙඳපොළේ කෝපි මිල ඉතිහාසගත ලෙස ඉහළ ගොස් ඇති බව ජාත්‍යන්තර මාධ්‍ය වාර්තා කරයි.

මේ හේතුවෙන් ලන්ඩනයේ කෝපි කෝප්පයක මිල පවුම් 5ක් (£5) දක්වාත්, අමෙරිකාවේ එය ඩොලර් 9ක් ($9) දක්වාත් ඉහළ ගොස් තිබේ.

ලොව ප්‍රධානතම කෝපි නිෂ්පාදකයන් වන වියට්නාමයට බලපෑ දැඩි නියඟය හා ටයිෆූන් චණ්ඩ මාරුතය නිසා ‘රොබස්ටා’ (Robusta) කෝපි අස්වැන්නද, බ්‍රසීලයට බලපෑ දැඩි හිම පතනය නිසා ‘ඇරබිකා’ (Arabica) කෝපි අස්වැන්නද විශාල ලෙස පහත වැටී ඇත.

මේ අතර, අමෙරිකානු ජනාධිපති ඩොනල්ඩ් ට්‍රම්ප් විසින් වියට්නාමය, ඉන්දුනීසියාව සහ බ්‍රසීලය වැනි රටවලින් ආනයනය කරන කෝපි සඳහා අධික බදු පැනවීම හේතුවෙන් ඇමරිකාව තුළ කෝපි මිල සීඝ්‍රයෙන් ඉහළ ගිය අතර, පසුව එල්ල වූ ජනතා විරෝධය හමුවේ එම බදු ඉවත් කිරීමට ධවල මන්දිරයට සිදුවිය.

යුරෝපා සංගමය විසින් වනාන්තර විනාශ කර වගා කරන කෝපි තහනම් කිරීමට නව නීති පැනවීම නිසාද නිෂ්පාදන පිරිවැය වැඩි වී ඇත.

කෙසේ වෙතත්, වර්තමාන තරුණ පරපුර ‘Cold Brews’ සහ ‘Matcha’ වැනි නවීන මිල අධික පාන වර්ගවලට යොමුවීමත්, චීනයේ ‘Luckin Coffee’ වැනි සමාගම් තාක්ෂණික ඇප් හරහා කෝපි අලෙවිය දියුණු කිරීමත් නිසා කෝපි සඳහා පවතින ඉල්ලුම අඩු වී නොමැත.

ආර්ථික විශ්ලේෂකයන් පෙන්වා දෙන්නේ පවතින සැපයුම් දාම බිඳවැටීම් හමුවේ, මිල ඉහළ ගියද ලෝකවාසී කෝපි ලෝලීන්ගේ ඉල්ලුම නොවෙනස්ව පවතින බැවින් ඉදිරියේදීත් කෝපි මිල ඉහළ මට්ටමක පවතිනු ඇති බවයි.