තායි රජය විදේ­ශි­ක­යන්ගේ වීසා රහිත කාල­සී­මාව අඩු කරයි

වීසා බලපත්‍ර රහිතව තායිලන්තයේ රැඳී සිටීමට විදේශිකයන්ට දුන් දින 60ක සහන කාලසීමාව දින 30ක් දක්වා සීමා කිරීමට එරට රජය පියවර ගෙන තිබේ.

ජාතික ආරක්ෂාව අරමුණු කරමින් මේ පියවර ගත් බව තායිලන්ත අගමැති අනුටින් චාර්න්විරකුල් ප්‍රකාශ කර ඇතැයි විදෙස් මාධ්‍ය වාර්තා කරයි.

කොවිඩ් වසංගතයෙන් පසු තායිලන්තයේ ආර්ථිකය නැංවීමේ පියවරක් ලෙස 2024 වසරේ ජූලි මාසයේ සිට රටවල් 93ක සංචාරකයන්ට එම දින 60ක වීසා රහිතව රැඳී සිටීමේ සහන කාලයක් ලබා දුන් අතර, එම කාලසීමාව අඩු කිරීමට තායිලන්තය රජය පියවර ගෙන ඇත්තේ ප්‍රචණ්ඩ ක්‍රියා, මත්ද්‍රව්‍ය සහ ලිංගික ජාවාරම් ඇතුළු නීතිවිරෝධි කටයුතු සම්බන්ධව අග්නිදිග ආසියාතික සංචාරකයන් රැසකට නඩු පැවැරීම සැලකිල්ලට ගැනීමෙන් පසුව බව තායිලන්තයේ විදේශ අමාත්‍යාංශය නිවේදනය කර තිබේ.

පසුගියදා එරට මධ්‍යම ප්‍රකාන් ප්‍රාන්තයේ ජාත්‍යන්තර ගුවන්තොටුපොළේ ස්වයංක්‍රිය වීදුරු ගේට්ටුවකට හානි කළ චීන ජාතිකයකුට භාත් 15,000ක දඩ මුදලක් නියම කර ඇති අතර, ඔහුගේ වීසා බලපත්‍රය අවලංගු කර අසාදු ලේඛනගත කිරීමට තායිලන්ත බලධාරින් පියවර ගෙන ඇති අතර, මේ වන විට අත්අඩංගුවේ පසුවන 30 හැවිරිදි එම පුද්ගලයාට නඩු පවරා ඇති බවත්, ඔහු වරදකරු වුවහොත් වසරක් දක්වා සිරදඬුවමකට යටත් වීමට සිදුවනු ඇති බවත් බැංකොක් පෝස්ට් පුවත් සේවය වාර්තා කළේය.

සංචාරකයන්ගේ මෙවැනි නීතිවිරෝධි කටයුතු හේතුවෙන් දින 60ක වීසා රහිත සහන කාලයක් ලබා දුන් ඔස්ට්‍රේලියාව, චීනය, ප්‍රංශය, ජර්මනිය, ඉන්දියාව, ඉතාලිය, ස්පාඤ්ඤය, අමෙරිකාව සහ බ්‍රිතාන්‍ය ඇතුළු රටවල් 93ක සංචාරකයන්ට වීසා රහිතව තායිලන්තයේ රැඳී සිටිය හැකි කාලය දින 30කට සීමා කර ඇති අතර, තායිලන්ත රාජකීය ගැසට් පත්‍රයට ඇතුළත් කිරීමෙන් පසු නව වීසා ක්‍රමවේදය බලාත්මක වනු ඇතැයි වාර්තා වේ.