ජාතික අධ්‍යාපන ආයතනයේ නව අධ්‍යක්ෂ ජනරාල් ලෙස ජ්‍යෙෂ්ඨ මහාචාර්ය ඕ.ජී. දයාරත්න බණ්ඩා මහතා

මහරගම ජාතික අධ්‍යාපන ආයතනයේ (NIE) 15 වන අධ්‍යක්ෂ ජනරාල්වරයා ලෙස ප්‍රමුඛ පෙළේ විද්වතෙකු සහ ආර්ථික විද්‍යාඥයෙකු වන ජ්‍යෙෂ්ඨ මහාචාර්ය ඕ.ජී. දයාරත්න-බණ්ඩා මහතා (2026 අප්‍රේල් 20) මහරගම පිහිටි එම ආයතන පරිශ්‍රයේදී නිල වශයෙන් රාජකාරි ආරම්භ කළා.

ජ්‍යෙෂ්ඨ මහාචාර්ය දයාරත්න-බණ්ඩා මහතා මෙරට මෙන්ම ජාත්‍යන්තර අධ්‍යාපන හා පර්යේෂණ ක්ෂේත්‍රයේ වසර ගණනාවක අත්දැකීම් ඇති ප්‍රවීණයෙක්.

මෙම පත්වීමට පෙර ඔහු පේරාදෙණිය විශ්වවිද්‍යාලයේ ආර්ථික විද්‍යාව පිළිබඳ ජ්‍යෙෂ්ඨ මහාචාර්යවරයෙකු ලෙස කටයුතු කළ අතර එම විශ්වවිද්‍යාලයේම ශාස්ත්‍ර පීඨයේ පීඨාධිපති (2015-2021) ලෙසද සේවය කර තිබෙනවා.

මීට අමතරවයි ඔහු ඌව වෙල්ලස්ස විශ්වවිද්‍යාලයේ කළමනාකරණ පීඨයේ පීඨාධිපති ලෙස කටයුතු කර ඇත්තේ.

සිංගප්පූරු ජාතික විශ්වවිද්‍යාලයෙන් (National University of Singapore) සිය ආචාර්ය උපාධිය (PhD) ලබාගත් ඒ මහතා පේරාදෙණිය විශ්වවිද්‍යාලයේ මූල්‍ය ආර්ථික විද්‍යාව පිළිබඳ ප්‍රථම පන්තියේ ගෞරව සාමර්ථ්‍ය සහිත උපාධිධාරියෙක්.

කැනඩාවේ වෝටර්ලූ විශ්වවිද්‍යාලය ඇතුළු ජාත්‍යන්තර විශ්වවිද්‍යාල කිහිපයක ආරාධිත පර්යේෂණ මහාචාර්යවරයෙකු ලෙස කටයුතු කර ඇති ඔහු ජාත්‍යන්තර පිළිගැනීමට ලක්වූ පර්යේෂණ පත්‍රිකා සහ කෘති රැසක කතුවරයෙක්ද වනවා.

ව්‍යවහාරික සාර්ව ආර්ථික විද්‍යාව, ජාත්‍යන්තර වෙළඳාම, බැංකු හා මූල්‍ය සහ ආර්ථික සංවර්ධනය යන ක්ෂේත්‍ර කෙරෙහි විශේෂ උනන්දුවක් දක්වන මහාචාර්යවරයාගේ විද්වත් නායකත්වය, ශ්‍රී ලංකාවේ අධ්‍යාපන ප්‍රතිපත්ති සම්පාදනය සහ ගුරු පුහුණු කටයුතු නවීකරණය කිරීමෙහිලා විශාල දායකත්වයක් වනු ඇතැයි අපේක්ෂාවයි.