ශ්‍රී ලංකා පෞද්ගලික දත්ත ආරක්ෂණ අධිකාරිය පිහිටුවයි

ජනාධිපති රනිල් වික්‍රමසිංහ මහතා විසින් ශ්‍රී ලංකා පෞද්ගලික දත්ත ආරක්ෂණ අධිකාරිය සඳහා සභාපතිවරයෙකු ඇතුළු අධ්‍යක්ෂ මණ්ඩල සාමාජිකයින් පත්කළ බව ජනාධිපති මාධ්‍ය අංශය පවසයි.

මෙරට පෞද්ගලික දත්ත ආරක්ෂා කිරීමේ අරමුණින් “ශ්‍රී ලංකා පෞද්ගලික දත්ත ආරක්ෂණ අධිකාරිය” පිහිටුවන ලදි.

එහි සභාපතිවරයා ලෙස ශ්‍රී ලංකාවේ සහ මාලදිවයිනේ අර්නස්ට් ඇනඩ් යන්ග් ආයතනයෙහි ජ්‍යෙෂ්ඨ වරලත් ගණකාධිකාරීවරයෙකු සහ හිටපු උපදේශකවරයෙකු වන අර්ජුන හේරත් මහතා පත් කර තිබේ.

හිටපු රජයේ නීතීඥ නිසිත් අබේසූරිය, ජනාධිපති නීතීඥ සෞම්‍යා අමරසේකර, ඩිජිටල් නීති විශේෂඥ හා පෞද්ගලික දත්ත ආරක්ෂණ පනත කෙටුම්පත් කිරීමේ කමිටුවේ සභාපති ජයන්ත ප්‍රනාන්දු, ජනාධිපති අතිරේක ලේකම් ආචාර්ය සුලක්ෂණ ජයවර්ධන, ජාත්‍යන්තර ප්‍රමිති ආයතතයේ සහතිකලත් විගණක හා තාක්ෂණ කළමනාකරණ විශේෂඥ බිම්සර සෙනෙවිරත්න සහ ඉලෙක්ට්‍රොනික ඉංජිනේරු හා ඩිජිටල් උපාය මාර්ග විශේෂඥ ෂෙහාන් විජේතිලක යන මහත්ම මහත්මීන්ව අධ්‍යක්ෂ මණ්ඩල සාමාජිකයන් ලෙස පත් ඇති බව වාර්තා විය.

මීට අදාළ 2022 අංක 9 දරන ශ්‍රී ලංකාවේ පෞද්ගලික දත්ත ආරක්ෂණ පනත, 2022 මාර්තු මස 19වැනි දින කතානායකවරයා විසින් සහතික කර බලාත්මක කරනු ලැබූ අතර ඒ සමඟ දකුණු ආසියානු කලාපයේ පුද්ගලික දත්ත ආරක්ෂණය වෙනුවෙන් නීති සම්පාදනය කළ පළමු රට බවට ශ්‍රී ලංකාව පත්විය.

2023 ජූලි මස 21වැනි දින නිකුත් වූ ගැසට් නිවේදනය මගින් මෙහි පස්වන කොටස ක්‍රියාත්මක කිරීමත් සමඟ පෞද්ගලික දත්ත ආරක්ෂණ පනත අදියර වශයෙන් ක්‍රියාත්මක කිරීමට නියමිතය.

මේ හරහා රාජ්‍ය ආයතන, බැංකු, සන්නිවේදන මෙහෙයුම් සහ රෝහල් වැනි ආයතන සතුව පවතින මහජනතාවගේ පෞද්ගලික දත්ත ආරක්ෂා කිරීම අරමුණු කරන අතර, පෞද්ගලිකත්ව නීතිය පිළිබඳ ගෝලීයව සිදුවන වර්ධනයන් මෙන්ම රජයේ සහ පෞද්ගලික අංශයේ ඩිජිටල් උපාය මාර්ග අනුවද මෙම පෞද්ගලික දත්ත ආරක්ෂණ පනත අතිශය වැදගත්කමක් උසුලයි.

එමගින් ජාතික ඩිජිටල් උපාය මාර්ග සහ ශ්‍රී ලංකාවේ අද්විතීය ඩිජිටල් අනන්‍යතා (SL-UDI) ව්‍යාපෘතිය සමඟ සමගාමීව, ආයෝජන ආකර්ෂණය කර ගැනීමට සහ ඩිජිටල් ආර්ථිකය ප්‍රවර්ධනය කිරීමටද අපේක්ෂා කරයි.

මෙම ස්වාධීන නියාමක යාන්ත්‍රණය විසින් පෞද්ගලික දත්ත නිසි ලෙස පාලනය කිරීම සහතික කිරීම සඳහා විවිධ අංශවල නියාමකයින් සමඟ සහයෝගයෙන් කටයුතු කිරීමට නියමිතය.

මෙම පනත කෙටුම්පත් කිරීමේ ක්‍රියාවලිය 2019 වර්ෂයේ සිට මහජන අදහස් විමසීම මගින් විනිවිදභාවයකින් යුතුව ආරම්භ කෙරුණු අතර ජනාධිපති රනිල් වික්‍රමසිංහ මහතා 2022 නොවැම්බර් මාසයේ පාර්ලිමේන්තුවේදී සිදුකළ අයවැය කතාවේදීද දත්ත ආරක්ෂණයේ අවශ්‍යතාව අවධාරණය කරමින් 2023 වසරේ දත්ත ආරක්ෂණ අධිකාරිය පිහිටුවීම සහතික කර සිටියේය.