Type to search

අම්පාරෙන් හමුවූයේ කලු දිලීර රෝගය නොවේ – වෛද්‍ය වජිර රාජපක්ෂ

100% ස්වභාවික පෝෂ්‍යදායි ප්‍රෝටීන් පිටි - ORA Naturals

කොවිඩ් ආසාදිතව ප්‍රතිකාර ලබමින් සිටින ඉන්දියානුවන් අතර පැතිර ගොස් තිබෙන කලු දිලීර රෝගය වැළඳුණු පුද්ගලයෙකු අම්පාරෙන් හමු වී ඇති බවට මාධ්‍ය මගින් වාර්තා කළ පුද්ගලයාට වැළඳී තිබෙන්නේ ඉන්දියාවේ ව්‍යාප්ත කලු දිලීර රෝගය නොව වෙනත් රෝගයක් බව අම්පාර ප්‍රාදේශීය වසංගත රෝග විද්‍යාඥ වජිර රාජපක්ෂ මහතා පවසනවා

ඊස්ට් වර්ගයේ දිලීරයක් හේතුවෙන් අදාල පුද්ගලයා මරණයට පත් වී ඇති බවත් මේ පිළිබඳව අම්පාර මහ රෝහලේ ක්ෂුද්‍ර ජීව විශේෂඥවරයා විසින්ද තහවුරු කළ බවත් ප්‍රකාශයක් සිදු කරමින් ඒ මහතා පවසනවා.

අම්පාර Covid 19 ප්‍රතිකාර මධ්‍යස්ථානයේ ප්‍රතිකාර ලබමින් සිටි කොරෝනා රෝගියෙකු Black fungus සෑදීමෙන් මියගිය බවට පැතිරෙන අසත්‍ය තොරතුරු නිවැරදි කිරීම.
අදාළ රෝගියා මියගොස් ඇත්තේ ඉහත කී දිලීරය මගින් නොව බහුලව හමුවන ඊස්ට් (Yeast) වර්ගයේ දිලීරයකින් බව අම්පාර මහරෝහලේ ක්ෂුද්‍ර ජීවී විශේෂඥ වෛද්‍ය තුමන් විසින් තහවුරු කරන ලදී.

සියලු දෙනාගේම දැන ගැනීම පිණිස මෙම Black fungus පිළිබඳව පහත සඳහන් කරුණු කිහිපයක් මෙලෙස හුවා දැක්වීම කාලෝචිත යැයි සිතමි.

1. මෙය Mycormycosis ලෙස හැඳින්වෙන කලාතුරකින් (Uncommon)දැකිය හැකි දිලීර රෝගයකි. මෙම දිලීරය සෑමදෙනාගේම පාහේ නාස් පුඩුවල පැවතිය හැකි අතර අවස්ථානෝචිතව (Opportunistic) අපව රෝගී තත්ත්වයට පත් කරයි. මෙය පරිසරය තුළද බහුලව ඇත. (උදා- පස්, අතහැර දැමු ගොඩනැගිලිවල බිත්ති)

2. මෙම දිලීර මගින් ඇස්, මොලය,පෙනහලු, ආහාර මාර්ගය, සම ආදී ස්ථානවල රෝගය ඇති කරන අතර සමහර අවස්ථාවලදී මුළු ශරීරය තුළම පැතිරි යා හැක.

3. ඇතිවන රෝග ලක්ෂණ ආසාදනය වූ ඉන්ද්‍රිය මත තීරණය වන අතර බහුලවම හමුවන්නේ කෝටරක ප්‍රදාහය සම්බන්ධ රෝග ලක්ෂණ වේ. (උණ, හිසරදය, ඇස් යට රිදීම…) ඇස්වලට රෝගය ඇතිවීමේදී ඇස් වටා ඇතිවන ඉදිමීම, Blurred vision හා Double vision ආදිය ඇතිවිය හැක.

4. වඩාත්ම දරුණු වන්නේ ඇස් හා මොළයට බලපාන Rhinocerebral තත්ත්වයයි.

5. මෙම රෝගය වැළඳීමට වැඩි අවදානමක් ඇති අය ලෙස පහත සඳහන් කාණ්ඩ සලකනු ලබයි. (ඒඩ්ස් රෝගීන්, පාලනයක් රහිත දියවැඩියාව ඇති අය, නිදන්ගත වකුගඩු අමාරු ඇති අය, අවයව බද්ධ කළ අය, පිළිකා සහිත අය, දීර්ඝකාලීනව ස්ටෙරොයිඩ් ඖෂධ ලබා ගන්නා අය, මන්දපෝෂණය ඇති අය හා වෙනත් හේතූන් නිසා ප්‍රතිශක්තිකරණ පද්ධතිය දුර්වල අය)

6. රෝග විනිශ්චය කරනුයේ බයොප්සි (Biopsy) පරීක්ෂණයක් මගිනි.

7. මෙම රෝගය සඳහා ඖෂධ ඇති නමුත් රෝගය වැළඳුනු පසුව එය දරුණු වී මරණයට පත්වීමේ ඉඩකඩ වැඩිය. සාමාන්‍යයෙන් ඇස්වලට හා මොළයට වැළඳෙන මෙම දිලීර රෝගය නිසා 30%-70% ප්‍රමාණයක් මරණයට පත්වෙයි.

8. මෑතකදී ඉන්දියාවෙන් මෙම දිලීර රෝගය නිසා මරණයට පත්වූ රෝගීන් වැඩිපුර වාර්තා වීම නිසා එය සෑම දෙනාගේම අවධානයට ලක්විය. මෙය ඉන්දියාවේ පමණක් නොව Covid 19 ලෝක ව්‍යාප්තියත් සමග ලෝකයේ ඕනෑම තැනක වාර්තා විය හැකි තත්ත්වයක් වන අතර එය මූලිකවම කරුණු තුනක් නිසා සිදුවිය හැක.
ප්‍රතිශක්තිය අඩු අයට Covid 19 රෝගය වැළඳීම.
Covid 19 රෝගය නිසා ප්‍රතිශක්තිකරණ පද්ධතිය දුර්වල වීම.
Covid 19 රෝගයට ප්‍රතිකාර ලෙස Dexamethasone වැනි ස්ටීරොයිඩ් (Steroids) වර්ගයේ ඖෂධ අධි මාත්‍රාවලින් රෝගීන්ට ලබා දීම.
(මූලාශ්‍ර සහ තොරතුරු ලබා ගැනීම – අන්තර්ජාලය, අම්පාර මහ රෝහලේ හා මඩකලපුව ශික්ෂණ රෝහලේ ක්ෂුද්‍ර ජීවී විශේෂඥ වෛද්‍යවරු)

වෛද්‍ය වජිර රාජපක්ෂ
ප්‍රාදේශීය වසංගත රෝග විද්‍යාඥ
අම්පාර

Tags:

You Might also Like

Leave a Comment

Your email address will not be published. Required fields are marked *