අයිතිකරු ඝාතනය කිරීමේ චෝදනාව මත කුකුළෙකුට එරෙහිව නඩු

කුකුළෙකුට එරෙහිව එහි හිමිකරු ඝාතනය කිරීමේ චෝදනාව මත ඉන්දීය තෙලුංගානා ප්‍රාන්තයේ පොලීසිය විසින් නඩු පැවරූ පුවතක් වාර්තා වේ.

ඉන්දියාවේ කුකුළ් පොරය විවිධ ප්‍රාන්තවල නීති විරෝධී ලෙස පවත්වනු ලැබේ. රහසිගතව විවිධ ස්ථානවල රැස්වන කුකුළ් පොර හිමිකරුවන්, මෙම තරඟ සඳහා රුපියල් මිලියන ගණනක් ඔට්ටු අල්ලති.

මෙම සටනේදී ඔවුන් කුකුළන්ගේ කකුල් වලට තියුණු පිහි බැඳ සටන් කිරීමට යොදවති. කුකුළන් දෙදෙනෙකු ආක්‍රමණශීලීව සටන් කරන විට, මෙම පිහි නිසා බරපතල තුවාල සිදුවිය හැකිය. සමහර විට කුකුළන් අවාසනාවන්ත ලෙස මිය යයි.

මේ අතර, තෙලුංගානා ප්‍රාන්තයේ කරීම්නගර් ප්‍රදේශයේදී නීති විරෝධී ලෙස පිරිසක් රැස්ව කුකුළ් පොරයක් පවත්වා ඇත. එම ස්ථානයට තම කුකුළා සමග සතීෂ් ද සහභාගි වී සිටියේය. මෙයට 16 කට වැඩි පිරිසක් සහභාගී වූ බව දැනගන්නට ලැබේ.

සතීෂ් ද, සටන සඳහා සිය කුකුළා සූදානම් කිරීමට දිලිසෙන තියුණු පිහි කකුලෙහි ගසමින් සිටියේය.

ඒ කුකුළා ඔහු වෙතින් පලා යාමට උත්සාහ කළ අතර ඔහු එය අල්ලා ගැනීමට උත්සාහ කරන විට කුකුළාගේ කකුලට බැඳ තිබූ පිහිය අනපේක්ෂිත ලෙස සතීෂ්ගේ ඉණට ඇනී ඇත. එහිදී ඔහු වේදනාවෙන් කෑගැසුවේය. පැමිණ සිටි අය වහාම ඔහුව ළඟම පිහිටි රෝහලකට ගෙන ගියද මඟදී ඔහු අවාසනාවන්ත ලෙස මිය ගියේය.

මෙයින් පසු පොලිසිය කුකුළාට එරෙහිව නඩු පවරා තිබේ. කුකුළා සහ උගේ කකුලට බැඳ ඇති පිහිය උසාවියේ ප්‍රදර්ශනය කළ යුතුව ඇති බැවින් එම කුකුළා පොලිසිය විසින් ආරක්ෂා කරනු ලැබේ.