Type to search

කොරෝනා වෛරසය සහ කටුනායක කම්කරුවන්ගේ වේදනාව: “මෙහෙම ගියොත් වහ කන්න තමයි වෙන්නේ”

Share

කටුනායක නිදහස් වෙළෙඳ කලාපයේ සේවකයින් සහ මෑන්පවර් සේවකයින් කෙරෙහි බලපාන හදිසි ඉල්ලීම්වලට ප්‍රතිචාර දක්වන ලෙස එම සේවකයින් වෙනුවෙන් පෙනී සිටින සංවිධාන සහ වෘත්තීය සමිති ශ්‍රී ලංකා ආයෝජන මණ්ඩලයෙන් ඉල්ලා සිටිති.

අනිවාර්ය ස්වයං නිරෝධායනය වෙත යොමු කරනු ලැබ ඇති සේවකයන්ට හදිසි සහන සලාක, අත්‍යවශ්‍ය ද්‍රව්‍ය සහ ඖෂධ ලබා දීම, මෑන්පවර් කම්කරුවන් ද ඇතුළුව COVID-19 නිසා රැකියා අහිමිවූ හෝ රැකියා කිරීමට නොහැකිව සිටින නිදහස් වෙළෙඳ කලාපයේ කම්කරුවන් සඳහා රුපියල් 10,000 සෞඛ්‍ය දීමනාවක් ලබා දීම ඉහත කී සංවිධාන විසින් ඉදිරිපත් කරනු ලැබ ඇති ඉල්ලීම්වලට ඇතුළත් වේ.

ඉහත කී සංවිධාන සහ වෘත්තීය සමිති විසින් ශ්‍රී ලංකා ආයෝජන මණ්ඩලය වෙත යොමු කරන ලද ලිපියේ දැක්වෙන සෙසු ඉල්ලීම්:

# කටුනායක නිදහස් වෙළඳ කලාපයේ සහ ඒ අවට සේවය කරන මෑන්පවර් කම්කරුවන් ද ඇතුළුව සියලුම කම්කරුවන් සඳහා PCR පරීක්ෂණ සිදු කිරීම.
# COVID-19 රෝගීන්ට ප්‍රතිකාර කරන සියලුම රජයේ නිරෝධායන පහසුකම් සහ රෝහල් ජාත්‍යන්තර ආරක්ෂණ ප්‍රමිතීන්ට අනුකූලවන බව සහතික කිරීම.

# නේවාසිකාගාරවල හෝ කර්මාන්ත ශාලාවල කිසිවෙකු COVID ආසාදිත බව හෝ රෝග ලක්ෂණ තිබෙන බව පෙන්නුම් කරන්නේ නම් සහ රජයේ ප්‍රතිචාර සහ හදිසි සම්බන්ධතා පිළිබඳ විස්තර ඇතුළුව අවදානම් සන්නිවේදනය සඳහා නිරන්තර ප්‍රවාහයක් පවත්වා ගැනීම. සියලුම සන්නිවේදනයන් සිංහල හා දෙමළ භාෂාවෙන් ලබා දී ඇති බවට සහතික වීම.

# නිරෝධායන මධ්‍යස්ථාන වෙත ගෙන යන කම්කරුවන්ට, අනිවාර්ය ස්වයං නිරෝධායනයක දී සහ / හෝ අගුලු දැමීමේදී වැඩට යාමට නොහැකි වූ අයට වන්දි ලබා දීම.

# ඒකාබද්ධ කාර්ය සාධක බලකා රැස්වීමේදී තීරණය කරන ලද අගුලු දැමීමේදී වන්දි ගෙවීම පිළිබඳ ත්‍රෛපාර්ශ්වික ගිවිසුම ප්‍රසිද්ධ කිරීම සහ බලාත්මක කිරීම.

# කර්මාන්තශාලා විවෘත කර ඇති විට හා වැඩ කිරීමට වාර්තා කරන ලෙස කම්කරුවන්ගෙන් ඉල්ලා සිටින විට රජයේ සෞඛ්‍ය බලධාරීන් හරහා ආරක්ෂක රෙගුලාසි දැඩි ලෙස ක්‍රියාත්මක කිරීම.

ලංකා බැංකු සේවක සංගමය (CBE), ලංකා වෘත්තීය සමිති සම්මේලනය (CFTU), ලංකා කාර්මික සේවක සංගමය (CIWU), ලංකා වෙළඳ කාර්මික සහ පොදු කම්කරු සංගමය (CMU), ලංකා ගුරු සංගමය (CTU), දාබිඳු සාමූහිකය, කටුනායක විමුක්ති ව්‍යාපාරය, ශ්‍රී ලංකාවේ නාවිකයන්ගේ ජාතික සංගමය (NUSS), ප්‍රගතිශීලී කාන්තා සාමූහිකය, මානව සංවර්ධනය සඳහා විප්ලවීය පැවැත්ම (RED), කටුනායක ශ්‍රමාභිමානී කේන්ද්‍රය, සීදූව ලංකා නැගී සිටිමු ව්‍යාපාරය සහ කටුනායක එක්සත් කම්කරු සංගමය (UFL) යන වෘත්තීය සමිති සහ සංවිධාන අදාළ ලිපියට අත්සන් තබා ඇත.

ශ්‍රී ලංකාවේ COVID-19 දෙවෙනි අදියරේ ප්‍රතිඵලයක් ලෙස මේ වන විට දහස් ගණනක් කම්කරුවන් දැඩි අර්බුදයකට මුහුණ දී සිටින බව පවසන වෘත්තීය සමිති සහ සංවිධාන මිනුවන්ගොඩ බ්‍රැන්ඩික්ස් කම්හලෙන් ආරම්භ වූ විශාල පොකුර මේ වන විට කටුනායක ඇතුළු අනෙකුත් නිදහස් වෙළෙඳ කලාප (FTZ) වෙත වේගයෙන් ව්‍යාප්ත වී ඇති බව ඉහත කී ලිපියේ දක්වා ඇත.

“හමුදාව විසින් පවත්වාගෙන යනු ලබන රජයේ නිරෝධායන මධ්‍යස්ථානවල දැනට නිරෝධායනය කරනු ලබන කම්කරුවන් 1000 කට වැඩි පිරිසකට අමතරව, බොහෝ කම්කරුවන්ට තම නේවාසිකාගාර සහ බෝඩිං ස්ථාන තුළ ස්වයං නිරෝධායනය වන ලෙස පවසා තිබේ,” යනුවෙන් ද එම ලිපියේ සඳහන් වේ.

වැඩිදුරටත් කරුණු දක්වන එම සංවිධාන සහ වෘත්තීය සමිති, “කම්කරුවන් නවාතැන්වලින් ඉවතට පැමිණියහොත් ඔවුන්ට එරෙහිව නීතිමය පියවර ගන්නා බවට නේවාසිකාගාර හිමියන්ට පොලීසිය විසින් අනතුරු අඟවා තිබේ. කෙසේ වෙතත්, මෙම කම්කරුවන්ට නිසි පූර්ව අනතුරු ඇඟවීමක් ලබා දී නොමැති නිසා, ඔවුන්ට ආහාර සහ ඖෂධ ඇතුළු මූලික අත්‍යවශ්‍ය දෑ ගබඩා කර ගැනීමට නොහැකි වී ඇති අතර, එබැවින් ඔවුහු දිවි ගලවා ගැනීමේ අරගලයක නියැලී සිටිති,” යනුවෙන් ද පවසති.

“මම මෑන්පවර් ඒජන්සියක් හරහා වැඩට ගිය කෙනෙක්. මට දැන් හිතෙනවා කොරෝනා හැදුන නම් මීට වඩා හොඳයි කියලා. එහෙම වුනා නම් ඉස්පිරිතාලෙක හරි ගිහින් වැටිලා දෙන දෙයක් කාලා ඉන්න තිබුණා. දැන් අපිට කර කියාගන්න දෙයක් නෑ. වැඩ තියෙයි කියලා හිතාගන්නවත් බෑ. බෝඩිමෙන් එළියට යන්නත් නෑ. හැමදාමත් කාමරයෙන් කාමරේ අනිත් අයගෙන් මොනව හරි ඉල්ගෙගෙන කන්න තමයි වෙලා තියෙන්නේ. දැන් දැන් අනිත් අය කාමරේ දොරවල් අරින්නෙත් නැහැ. ඇත්තටම ඒ ළමයින්ටත් නැතිකොට කොහොමද තවත් උන්ව බලාගන්නේ. ගෙදර යන්න විදිහකුත් නැහැ. කවුරුවත් අපි බාර ගන්න ලෑස්ති නැහැ .මෙහෙම ගියොත් වහ ටිකක් කන්න තමයි වෙන්නේ,” කටුනායක ඇවරිවත්තේ ස්වයං නිරෝධායනයේ සිරවී සිටින මෑන්පවර් සේවකයෙකු පැවසුවේ යයි ලිපියේ වැඩිදුරටත් දැක්වේ.

-BBC NEWS

Tags:

You Might also Like

Leave a Comment

Your email address will not be published. Required fields are marked *