”එදා ලාංකිකයා සවුදි මවකට සමාව දුන්නා, අද ලාංකික පුතාට අනුකම්පාව දක්වන්න” – මනෝ ගනේෂන්
සවුදි අරාබියේදී මරණ දඬුවමට ලක්ව සිටින ශ්‍රී ලාංකිකයෙකු වන අනෝජන් සිවරාසාට (Anojan Sivarasa) සමාව ලබා දෙන ලෙස දෙමළ ප්‍රගතිශීලී සන්ධානයේ (TPA) නායක මනෝ ගනේෂන් මහතා සවුදි අරාබියේ කිරුළහිමි කුමරු සහ අග්‍රාමාත්‍ය මුහම්මද් බින් සල්මාන් (Mohammed bin Salman) මහතාගෙන් ඉල්ලීමක් කර ඇත.
මානුෂීය පදනම මත මෙම ඉල්ලීම කරමින් මනෝ ගනේෂන් මහතා පෙන්වා දුන්නේ, මීට දශක දෙකකට පමණ පෙර සිය බිරිඳගේ ඝාතනය සම්බන්ධයෙන් මරණ දඬුවම නියම වූ සවුදි ජාතික කාන්තාවකට ශ්‍රී ලාංකිකයෙකු විසින් සමාව ලබා දුන් සිදුවීමයි.
X (ට්විටර්) ගිණුමේ සටහනක් තබමින් මනෝ ගනේෂන් මහතා සඳහන් කළේ, සවුදි අරාබියේදී සිදු වූ ඝාතනයකින් සහදේවන් නම් ශ්‍රී ලාංකිකයාට සිය බිරිඳ වූ රාජමණී අහිමි වූ බවයි. එම ඝාතනය සම්බන්ධයෙන් වගකිව යුතු සවුදි ජාතික කාන්තාවකට පසුව මරණ දඬුවම නියම විය.
කෙසේ වෙතත්, එම කාන්තාවගේ දරුවන් කෙරෙහි දැක්වූ අනුකම්පාව නිසා ඇයට සමාව දීමට සහදේවන් තීරණය කළ අතර, ඒ අනුව ඇයව මරණ දඬුවමින් බේරා ගැනීමට හැකි වූ බව ගනේෂන් මහතා පැවසීය.
අනෝජන් සිවරාසාගේ සිද්ධිය සම්බන්ධයෙන් ද අදහස් දක්වමින්, එම ශ්‍රී ලාංකිකයා කෙරෙහි ද එවැනිම දයාවක් සහ අනුකම්පාවක් දක්වන ලෙස මනෝ ගනේෂන් මහතා සවුදි කිරුළහිමි කුමරුගෙන් ඉල්ලා සිටියේය.
”එදා ශ්‍රී ලාංකික පවුලක් සවුදි ජාතික මවකට සමාව දුන්නා. දැන් සවුදි අරාබිය ශ්‍රී ලාංකික පුතෙකුට අනුකම්පාව දක්වාවි යැයි බලාපොරොත්තු වෙනවා,” යැයි මනෝ ගනේෂන් මහතා පැවසීය.
මෙම ඉල්ලීම මානුෂීය පදනම මත, අනුකම්පාව, දයාව සහ ජීවිතයක් බේරා ගැනීමේ පරමාර්ථයෙන් සිදු කරන බව ද ඔහු වැඩිදුරටත් පැවසීය.
About The Author
