ශ්රී ලංකා මුහුදු සීමාවට ඉරාන නැව් ඇතුළු වූ බවට පළ වූ වාර්තා විදේශ අමාත්යවරයා ප්රතික්ෂේප කරයි
ශ්රී ලංකාවට අයත් ප්රාදේශීය මුහුදු සීමාවට ඉරාන නෞකා ඇතුළු වී ඇති බවට පළ වන වාර්තා විදේශ කටයුතු අමාත්ය විජිත හේරත් මහතා ප්රතික්ෂේප කර තිබේ. ශ්රී ලංකාව ආසන්නයේ ඇති ජාත්යන්තර මුහුදු සීමාවේ නෞකා කිහිපයක් ගමන් කරමින් සිටින අතර බලධාරීන් ඒ පිළිබඳ නිරන්තර අවධානයෙන් පසුවන බව හෙතෙම පැවසීය.
කැබිනට් තීරණ දැනුම්දීමේ මාධ්ය හමුවට එක්වෙමින් අමාත්යවරයා සඳහන් කළේ, ශ්රී ලංකාවට ආසන්න මුහුදේ ඉරාන නෞකා ඇතුළුව නෞකා 47ක් හඳුනාගෙන ඇති නමුත්, ඒ කිසිවක් ශ්රී ලංකාවේ මුහුදු සීමාවට ඇතුළු වී නොමැති බවයි.
”ශ්රී ලංකාව ආසන්නයේ නෞකා 47ක් හඳුනාගෙන තිබෙනවා. ඒවා ඉරාන නෞකා විතරක් නෙවෙයි. ඇතැම් ඒවා ඉරානයට අයත් වුවත්, ඒවා තියෙන්නේ ශ්රී ලංකාවේ ප්රාදේශීය මුහුදු සීමාවෙන් ඔබ්බෙහි වූ ජාත්යන්තර මුහුදු සීමාවේ,” යැයි හේරත් මහතා පැවසීය.
තායිලන්තය සහ මැලේසියාව වැනි රටවලට අයත් නෞකා ද මෙම කලාපයේ ගමන් කරන බව පැවසූ අමාත්යවරයා, වෙළඳ නෞකා ජාත්යන්තර මුහුදු සීමාවේ රැඳී සිටීම සාමාන්ය දෙයක් බව ද සඳහන් කළේය.
”ශ්රී ලංකා රජය ලෙස මෙම නෞකාවලට අපගේ මුහුදු සීමාවට ඇතුළු වීමට කිසිදු ඉල්ලීමක් ලැබී නැහැ. අපි ඒ සඳහා කිසිදු අවසරයක් ලබා දීත් නැහැ,” යැයි ද හෙතෙම පැවසීය.
කෙසේ වෙතත්, පසුගිය සතියේ මෙම නෞකා කිහිපයක් වෙරළේ සිට නාවික සැතපුම් 11.4 ත් 11.6 ත් අතර දුරින් පැවතීම මගින් ශ්රී ලංකාවට හිමි නාවික සැතපුම් 12ක ප්රාදේශීය මුහුදු සීමාවට ආසන්න වී, පසුව නාවික සැතපුම් 24ක් පමණ දුරට ගමන් කළ බව මාධ්යවේදීන් මෙහිදී පෙන්වා දුන්නේය.
නමුත් ශ්රී ලංකා බලධාරීන්ගේ නිරීක්ෂණවලට අනුව මෙම නෞකා කිසිවක් රටේ ප්රාදේශීය මුහුදු සීමාවට ඇතුළු වී නොමැති බව අමාත්යවරයා නැවතත් තහවුරු කළේය.
”කොළඹ පිහිටි ඇමෙරිකානු තානාපති කාර්යාලය විසින් ඉරාන නෞකා කිහිපයක් සම්බන්ධයෙන් විදේශ කටයුතු අමාත්යාංශය දැනුවත් කරමින්, ඒ පිළිබඳව අවධානයෙන් සිටින්නේදැයි විමසා සිටියා. ඒ අනුව ආරක්ෂක සහ වරාය අමාත්යාංශ දැනුවත් කර ඇති අතර, අදාළ නෞකා පිළිබඳව නිරන්තර නිරීක්ෂණය සිදු කෙරෙනවා. ඒවා අපගේ මුහුදු සීමාවේ නැහැ,” යනුවෙන් අමාත්යවරයා වැඩිදුරටත් පැවසීය.
ඇමෙරිකානු සම්බාධක හමුවේ ඉරාන කොඩිය සහිත නෞකා කිහිපයක් ශ්රී ලංකාවට අයත් සුවිශේෂී ආර්ථික කලාපය (EEZ) ආසන්නයේ රැඳී සිටින බවට මීට පෙර මාධ්ය වාර්තා පළ වී තිබුණි.
ශ්රී ලංකා නාවික හමුදාව සඳහන් කළේ, අදාළ නෞකා ශ්රී ලංකාවේ සුවිශේෂී ආර්ථික කලාපය (EEZ) ආසන්නයේ තිබුණ ද, ඒවා මෙරට සවෙරිපත්ය බලය හිමි ප්රාදේශීය මුහුදු සීමාවෙන් පිටත පිහිටා ඇති බැවින් ශ්රී ලංකාවේ සෘජු නීතිමය බලපෑමට යටත් නොවන බවයි.
ශ්රී ලංකාවේ ප්රාදේශීය මුහුදු සීමාව (Territorial sea) වෙරළේ සිට නාවික සැතපුම් 12ක් දක්වා විහිදේ.
About The Author
