ඩොලරයට සාපේක්ෂව රුපියල 2.9%කින් අවප්‍රමාණයට

2026 අප්‍රේල් අවසානය වන විට ශ්‍රී ලංකා රුපියල, අමෙරිකානු ඩොලරයට සාපේක්ෂව 2.9%කින් අවප්‍රමාණය වී ඇති බව ශ්‍රී ලංකා මහ බැංකුව පවසයි.

2026 පෙබරවාරි අගදී ආරම්භ වූ මැද පෙරදිග ගැටුම් හේතුවෙන් ඇති වූ බාහිර අංශයේ පීඩනයන් රුපියල අවප්‍රමාණය වීමට බලපා ඇති බව එම බැංකුව සඳහන් කරයි.

ශ්‍රී ලංකා මහ බැංකුවේ ඊයේ (01) දින නිල දෛනික විනිමය අනුපාතික සටහනට අනුව, එක්සත් ජනපද ඩොලරයක ගැනුම් මිල රු. 315.87ක් ලෙසත්, විකුණුම් මිල රු. 323.80ක් ලෙසත් සටහන් වී ඇත. එසේම, නිරූපිත එතැන් විනිමය අනුපාතිකය රු. 319.34ක් ලෙස වාර්තා වී ඇත.

මේ අතර, 2026 මාර්තු අග වන විට, චීන මහජන බැංකුව සමඟ ඇති විදේශ විනිමය හුවමාරු පහසුකම ද ඇතුළත්ව, දළ නිල සංචිතය ඇමරිකානු ඩොලර් බිලියන 7.0ක් ලෙස පැවති බව මහ බැංකුව පවසයි.

කෙසේ වෙතත්, මහ බැංකුව විසින් විදේශ විනිමය මිලදී ගැනීම් සිදු කළද, විදේශ ණය සේවා ගෙවීම් හේතුවෙන් එම මාසය තුළ දළ නිල සංචිත පහළ යාමට ලක්ව ඇති බවද වැඩිදුරටත් සඳහන් වේ.