මියන්මාරයේ බෞද්ධ ආරාමයකට ගුවන් ප්‍රහාරයක්; 23ක් මරුට

මියන්මාරයේ බෞද්ධ ආරාමයකට ගුවන් ප්‍රහාරයක් එල්ල වීමෙන් ආරාම පරිශ්‍රයේ නවාතැන් ගෙන සිටි පුද්ගලයින් 23 දෙනෙකු මිය ගොස් ඇති බව විදෙස් මාධ්‍ය වාර්තා කළහ.

සගායිං නගරයේ ලින් ටා ලු ගම්මානයේ පිහිටි ආරාමයට ඊයේ (11) රාත්‍රියේ එල්ල වූ ගුවන් ප්‍රහාරයෙන් තවත් පුද්ගලයින් 30 දෙනෙකු පමණ තුවාල ලැබූ අතර, ඉන් 10 දෙනෙකුගේ තත්ත්වය බරපතල බවද වාර්තා වි ඇත.

මෑත කාලීනව එකී කලාපයේ සටන් වළක්වා ගැනීම සඳහා අවට ගම්මානවලින් 150 කට වැඩි පිරිසක් නවාතැන් ගෙන සිටි ගමේ ආරාමයේ ගොඩනැගිල්ලකට අලුයම 1ට පමණ ප්‍රහාරක යානයක් බෝම්බයක් හෙළීමෙන් පසු ළමුන් හතර දෙනෙකු ඇතුළු සිවිල් වැසියන් 23 දෙනෙකු මිය ගොස් තිබේ.

2021 පෙබරවාරි මාසයේදී අවුන් සාන් සූ කීගේ තේරී පත් වූ රජයෙන් හමුදාව බලය අල්ලා ගැනීමෙන් පසු සිවිල් යුද්ධයක් ඇති වූදා සිට මියන්මාරය කැළඹිලි සහිත තත්ත්වයක පවතී. සාමකාමී විරෝධතා මාරාන්තික බලයෙන් මර්දනය කිරීමෙන් පසු, හමුදා පාලනයට විරුද්ධ වූ බොහෝ දෙනෙක් ආයුධ අතට ගත් අතර, රටේ විශාල ප්‍රදේශයක ජනතාව ගැටුම්වලට මැදිවී සිටිති.