බොරැල්ල පල්ලියේ බෝම්බෙ පොලිසියේ තොරතුරු නිවැරදි නෑ; දේශපාලකයන්ට ගැතිකම් කරමින් බොරු කරන්න එපා – කාදිනල් හිමි
රට ගොඩගන්න තියෙන ලොකුම බාධාව රාජපක්ෂ පවුල තවදුරටත් බලයේ රැඳීසිටීමයි - කොළඹ අගරදගුරුතුමෝ
පොලිසිය සිටින්නේ අවංකව සත්‍ය වෙනුවෙන් වැඩ රකන්නට මිස දේශපාලනකයන්ට ගැතිකම් කිරීමට නොවන බවත්, ඇස් පනාපිට බොරු නොකර කරුණාකර යුනිෆෝම් ගලවා ඉවත්ව යන ලෙසත් කාදිනල් හිමියෝ සියලු ශාන්තුවරයන්ගේ දෙවස්ථානයේ බෝම්බ සිද්ධියට අදාලව පරීක්ෂණ කරන පොලිස් කණ්ඩායම් වලට පැවසූහ. උන්වහන්සේ මේ බව ප්‍රකාශ කළේ (13) කොළඹ අගරදගුරු නිවසේ දී මාධ්‍ය හමුවක් පවත්වමිනි.
කාදිනල් හිමියන් පෙන්වා දෙන්නේ මේ සිද්ධිය අතිශයින් ජුගුප්සාජනක ලෙස වසන් කිරීමට පොලිසිය කටයුතු කරන බවය.
කාදිනල් රංජිත් හිමිපාණන් කියා සිටියේ පොලිසිය සිද්ධියට අදාළ වීඩියෝ දර්ශන නිසි ලෙස නරඹා නොමැති බවයි. “පොලිසිය යම් හේතුවක් නිසා පල්ලියේ සීසීටීවී දර්ශන පමණක් බැලුවා. පල්ලියේ සැන්ක්‍රිස්ටියන් (භාරකරු) අත්අඩංගුවට ගනු ලැබුවේ එදින සවස 3:00න් පසු පටිගත කරන ලද වීඩියෝ දර්ශන නැරඹීමෙන් පමණි, ”අගරදගුරුතුමාණෝ පැවසූහ.
“මුළු දවසම පටිගත කරන ලද වීඩියෝ දර්ශන නරඹන ලෙස මම පල්ලියේ පූජකවරයාගෙන් ඉල්ලා සිටියා ඒ අනුව සැක කටයුතු මිනිසෙකු පල්ලියට ඇතුළු වී යමක් බිම තබා ගන්නා බව CCTV දර්ශනවලින් හෙළි වුණා.
ඉන්පසු ඔහු පල්ලියට ඇතුළු වී නමස්කාර කිරීමේදී කතෝලිකයන් විසින් අනුගමනය කරන ආගමික සම්ප්‍රදායක් වන සම්ප්‍රදායික ‘කුරුස ලකුණ’ පැළඳ සිටියා. කෙසේ වෙතත්, මෙම පුද්ගලයා එය වැරදි ආකාරයෙන් කරා. මේ පුද්ගලයාගේ ක්‍රියාව තුළින් ඔහු කතෝලිකයෙකු නොවන බව නිගමනය කළ හැකියි” කාදිනල් රංජිත් හිමිපාණෝ පැවසූහ.
“ඒ වගේම මේ පුද්ගලයා කොර ගසමින් පැමිණියත් පල්ලියේ සිට ආපසු යන විට ඔහු ස්ථාවර ලෙස ඇවිදිමින් ගියා” වැඩිදුරටත් පැවසූහ.
“මෙවැනි තත්ත්වයන් තුළ අපි පොලිසියෙන් ඉල්ලා සිටින්නේ විධිමත් පරීක්ෂණයක් පවත්වන ලෙසයි”.
