සෞදි රජයේ ඩොලර් මිලියන 28ක සහන ණය මත වයඹ විශ්වවිද්‍යාලයීය නගර සංවර්ධන ව්‍යාපෘති කිහියක්
සංවර්ධනය සඳහා වන සෞදි අරමුදලේ ප්‍රතිපාදන මත ක්‍රියාත්මක ශ්‍රී ලංකා වයඹ විශ්වවිද්‍යාල නගර ආශ්‍රිත සංවර්ධන ව්‍යාපෘතිය අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් (27)වන දින සමාරම්භ විය.
කුලියාපිටිය වයඹ විශ්වවිද්‍යාලයීය පරිශ්‍රයේ පැවැති උත්සව සභාවට අරලියගහ මන්දිරයේ සිට මාර්ගගත තාක්ෂණයෙන් එක්වූ අග්‍රාමාත්‍ය මහින්ද රාජපක්ෂ මහතා ව්‍යාපෘතියේ සමාරම්භය සනිටුහන් කරමින් එහි සමරු ඵලකය නිරාවරණය කළේය.
මෙම ව්‍යාපෘතිය සඳහා ඇස්තමේන්තුගත වියදම අමෙරිකානු ඩොලර් මිලියන 28කි. එම මුදල සහන ණයක් ලෙස ලබා දීමට සංවර්ධනය සඳහා වන සෞදි අරමුදල ගිවිසුම් ගත වී තිබේ.
වයඹ විශ්වවිද්‍යාලයේ කුලියාපිටිය සහ මාකදුර පරිශ්‍රයන් කේන්ද්‍ර කරගනිමින් මෙම ව්‍යාපෘතිය ක්‍රියාත්මක වේ.
කුලියාපිටිය පරිශ්‍රයට රුපියල් මිලියන 1942ක් සහ මාකදුර පරිශ්‍රයට රුපියල් මිලියන 1973ක් වැය කිරීමට නියමිත අතර දැනට පවතින පීඨ ගොඩනැගිලි සංකීර්ණයට උපකරණ මිලදී ගැනීමට තවත් රුපියල් මිලියන 262ක් වෙන් කර ඇත.
ව්‍යාපෘතියේ සමාරම්භයට සමඟාමීව වයඹ විශ්වවිද්‍යාලයේ කුලියාපිටිය පරිශ්‍රයේ නව පුස්තකාල ගොඩනැගිල්ලට මුල්ගල තැබීම අද දින සිදුවිය. ඊට වැයවන මුදල රුපියල් මිලියන 259කි.
පාර්ලිමේන්තු මන්ත්‍රීවරුන්වන බී.වයි.ජී රත්නසේකර, සමන්ප්‍රිය හේරත්,ශ්‍රී ලංකාවේ සෞදි රජයේ තානාපති අබ්දුල් නසීර් බින් හුසේන් අල්-හර්ති, සංවර්ධනය සඳහා වන සෞදි අරමුදලේ ප්‍රධාන විධායක නිලධාරි සුල්තාන් අර් මර්ෂාඩ්, වයඹ විශ්වවිද්‍යාලයේ වැඩබලන උපකුලපති වෛද්‍ය සංජීව බෝවත්ත මහත්වරු ඇතුළු පිරිසක් නව පුස්තකාල ගොඩනැගිල්ලට මුල්ගල තැබීමට එක්වූහ.
රටේ සමාජ ආර්ථික සංවර්ධනයට සරිලන පරිදි වෘත්තිමය වශයෙන් දක්ෂ හා දක්ෂ උපාධිධාරීන් බිහිකිරීම සඳහා විශ්වවිද්‍යාල අධ්‍යාපනයේ ගුණාත්මකභාවය සහ අදාළත්වය ඉහළ නැංවීමට අධ්‍යාපන අමාත්‍යාංශයේ උසස් අධ්‍යාපන අංශය මඟින් මෙම ව්‍යාපෘතිය ක්‍රියාත්මක කරයි.
වයඹ විශ්වවිද්‍යාල නගර සංවර්ධන වැඩසටහන තුළ විශ්වවිද්‍යාල ප්‍රජාව සහ අවට ප්‍රජාවන් සමඟ සමීප අන්තර් ක්‍රියාකාරීත්වය වැඩි දියුණු කිරීම මෙන්ම ග්‍රාමීය ප්‍රදේශ ශක්තිමත් කිරීම තුළින් සැළකිය යුතු සංවර්ධන බලපෑමක් ඇති කිරීමට ද අපේක්ෂිතය.
අරලියගහ මන්දිරයේ සිට මෙම අවස්ථාවට අධ්‍යාපන අමාත්‍ය දිනේෂ් ගුණවර්ධන,මහා මාර්ග අමාත්‍ය ජොන්ස්ටන් ප්‍රනාන්දු, අධ්‍යාපන අමාත්‍යාංශයේ ලේකම් ජ්‍යෙෂ්ඨ මහාචාර්ය කපිල පෙරේරා, විශ්වවිද්‍යාල ප්‍රතිපාදන කොමිෂන් සභාවේ සභාපති ජ්‍යෙෂ්ඨ මහාචාර්ය සම්පත් අමරතුංග මහත්වරු ඇතුළු රාජ්‍ය නිලධාරීහු පිරිසක් එක්ව සිටියහ.
About The Author
