සුළු හා මධ්‍ය පරිමාණ කර්මාන්ත සහ ගෙවතු වගාවට ඉඩම් නිදහස් කරන්න බැසිල්ගෙන් උපදෙස්

ග්‍රාමීය ආර්ථිකය නගා සිටුවීම වෙනුවෙන් 2021 අයවැයෙන් යෝජනා කර ඇති සුළු හා මධ්‍ය පරිමාණ කර්මාන්ත සහ ගෙවතු වගා වැඩසහටන ඇතුළු රජයේ සංවර්ධන කාර්යයට සුදුසු තත්ත්වයේ පවතින ඉඩම් හඳුනාගෙන කඩිනමින් කළමනාකරණය කරදෙන්නැයි ආර්ථික පුනර්ජීවනය සහ දරිද්‍රතාවය තුරන් කිරිම සඳහා වන ජනාධිපති කාර්ය සාධන බලකායේ සභාපති බැසිල් රාජපක්ෂ මහතා ඉඩම් විෂයට අයත් ප්‍රාදේශිය මට්ටමේ නිලධාරීන්ට උපදෙස් දෙයි.

නව ජීවනෝපාය මාර්ග ඇතිකිරීමේ රජය ගෙන යන වැඩපිළිවෙල සඳහා පරිහරණයට සුදුසු ඉඩම් කළමනාකරණය කරදීමේදි ප්‍රාදේශීය මට්ටමේ නිලධාරීන්ට විශේෂ කාර්යභාරයක් පැවරී තිබෙන බවද ඒ මහතා සඳහන් කළේය.

“ගම සමඟ පිළිසඳරක් තුළින් වැඩ සමඟ යළි ගමට” ජාතික වැඩසටහනට සමගාමිව (12) අරලියගහ මන්දිරයේ පැවති ඉඩම් විෂයට අදාළ නිලධාරීන් දැනුවත් කිරීමේ වැඩසටහනට එක්වෙමින් බැසිල් රාජපක්ෂ මහතා මේ බව පැවසුවේය.

ලංකාවේ පැරණිතම දෙපාර්තමේන්තුවක් වන ඉඩම් කොමසාරිස් ජනරාල් දෙපාර්තමේන්තුව මෙතෙක් සිදුකර ඇති ජාතික සේවාවන් ප්‍රශංසාවට ලක් කළ බැසිල් රාජපක්ෂ මහතා තම තමන්ගේ බලප්‍රදේශවල තිබෙන පරිහරණය සඳහා සුදුසු ඉඩම් පිළිබඳ තොරතුරු ලබාදෙන ලෙසද ඉඩම් විශයට අදාළ ප්‍රාදේශිය මට්ටමේ නිලධාරීන්ට උපදෙස් ලබාදුන්නේය.

“ගම සමඟ පිළිසඳරක් තුළින් වැඩ සමඟ යළි ගමට” 2021 අයවැය යෝජනා ක්‍රියාත්මක කිරීමේ වැඩසටහන සඳහා සියලු නිලධාරීන්ගේ සහය ලබාදෙන ලෙසත් ග්‍රාමීය කමිටුවල සාමාජිකත්වය දරමින් ප්‍රාදේශීය උප කමිටු වන කෘෂිකර්ම හා ජීවනෝපාය කමිටුවලට සහය දක්වන ලෙසත් ඒ මහතා වැඩිදුරටත් සඳහන් කළේය.

ඉඩම් කොමසාරිස් දෙපාර්තමේන්තුව, ශ්‍රී ලංකා මිනින්දෝරු දෙපාර්තමේන්තුව, ඉඩම් ප්‍රතිසංස්කරණ කොමිෂන් සභාව,ඉඩම් නිරවුල් කිරිමේ දෙපාර්තමේන්තුව,ඉඩම් පරිහරණ ප්‍රතිපත්ති සැලසුම් දෙපාර්තමේන්තුව, මැනුම් හා සිතියම්ගත කිරීමේ දෙපාර්තමේන්තුව, ඉඩම් මැනුම් සභාව, ඉඩම් අත්කරගැනීමේ වන්දි සමාලෝචන මණ්ඩලය මෙම වැඩසටහන සඳහා දායක වේ.

ඒ අනුව සත්ත්ව ආහාර නිෂ්පාදන ප්‍රවර්ධනය සඳහා අක්කර 25000ක්, දේශිය කෘෂි නිෂ්පාදන ප්‍රවර්ෂනය සඳහා ගොවි ප්‍රජාව වෙනුවෙන් අක්කර 75000ක් සහ ව්‍යාපාරික ප්‍රජාවට අක්කර 25000ක් ලබාදීමට යෝජිතය .

එමෙන්ම කර්මාන්තකරුවන් සඳහා ඉඩම් ලබාදීම, තරුණ ව්‍යවසායකයින් සවිබල ගැන්වීම සදහා රජයේ ඉඩම්වල ආයෝජන අවස්ථා ලබාදීම, දැනටමත් හඳුනාගෙන ඇති රජයේ ඉඩම් පරිහරණය කරන්නන් වෙත කඩිනමින් නීත්‍යානුකූල ලියවිලි නිකුත් කිරීම, ජනතාව වෙත ලබාදී ඇති රජයේ ඉඩම් ආශ්‍රිත ගැටළු විසඳීම සඳහා කාර්යක්ෂම යාන්ත්‍රණයක් සකස් කිරීම යන වැඩසටහන් මෙම වසරේදී ක්‍රියාත්මක කිරීමට නියමිතය.

2021 අයවැයෙන් බිම් සවිය වැඩසටහන යටතේ දීමනා පත්‍ර 20000ක් ලබාදිම වෙනුවෙන් රුපියල් මිලියන 500ක්, ඉඩම් අහිමි අඩු ආදායම්ලාභීන් 50000ක් සඳහා දීමනා පත්‍ර ලබාදීම වෙනුවෙන් රුපියල් මිලියන 45ක්, ඉඩම් දත්ත පද්ධතිය සකස් කිරීම හා යාවත්කාලීන කිරීම වෙනුවෙන් රුපියල් මිලියන 100ක්, අත්පත් කටයුතු වෙනුවෙන් වන්දි ලෙස රුපියල් මිලියන 2593ක්, මැනුම් උපකරණ සඳහා රුපියල් මිලියන 600ක් සහ ජංගම සේවා වෙනුවෙන් රුපියල් මිලියන 7ක මුදලක් ප්‍රතිපාදන ලෙස වෙන් වී ඇත.

මෙම අවස්ථාවට රාජ්‍ය අමාත්‍ය රොෂාන් රණසිංහ මහතා, ඉඩම් අමාත්‍යංශයේ ලේකම්, රාජ්‍ය අමාත්‍යංශයේ ලේකම් ඇතුළු ඉඩම් දෙපාර්තමේන්තු, ඉඩම් පරිහරණ සහ ඉඩම් ප්‍රතිසංස්කරණ දෙපාර්තමේන්තු නිලධාරීන් රැසක් සහභාගී වූහ.