​අපරාධ පනතට සංශෝධන ගෙන ඒමට රජයෙන් පියවර!

ශ්‍රේෂ්ඨාධිකරණය හමුවේ අභියෝගයට ලක් කර ඇති යෝජිත සංවිධානාත්මක අපරාධ වැළැක්වීමේ පනත් කෙටුම්පතට (Prevention of Organised Crimes Bill) සංශෝධන එකතු කිරීමට රජය අදහස් කරන බව නීතිපතිවරයා අද (09) ශ්‍රේෂ්ඨාධිකරණයට දැනුම් දුන්නේය.
යෝජිත සංශෝධන පාර්ලිමේන්තුවේ කාරක සභා අවස්ථාවේදී (Committee Stage) ඉදිරිපත් කරන බව පැවසූ නීතිපතිවරයා, අධිකරණයේ සලකා බැලීම සඳහා අදාළ සංශෝධන ඇතුළත් ලේඛනයක් ද ඉදිරිපත් කළේය.
රජයේ යෝජිත පනත් කෙටුම්පතේ ආණ්ඩුක්‍රම ව්‍යවස්ථානුකූලභාවය අභියෝගයට ලක් කරමින් ගොනුකර ඇති පෙත්සම් 26ක් ශ්‍රේෂ්ඨාධිකරණය හමුවේ අද නැවත කැඳවූ අවස්ථාවේදී මෙම දැනුම්දීම සිදු කරන ලදී.
අග්‍ර විනිශ්චයකාර ප්‍රීති පද්මන් සුරසේන, අචල වෙංගප්පුලි සහ සම්පත් අබේකෝන් යන ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල හමුවේ මෙම පෙත්සම් විභාගයට ගැනේ.
ශ්‍රී ලංකා නීතිඥ සංගමය (BASL) ඇතුළු පාර්ශ්ව කිහිපයක් විසින් මෙම පෙත්සම් 26 ගොනු කර ඇත්තේ පනත් කෙටුම්පතේ ඇතැම් වගන්ති ආණ්ඩුක්‍රම ව්‍යවස්ථාවට පටහැනි බවට තීන්දුවක් ලබා දෙන ලෙස ඉල්ලමිනි.
ඔක්තෝබර් 06 වැනිදා ගැසට් පත්‍රයේ ප්‍රකාශයට පත් කරන ලද යෝජිත පනත් කෙටුම්පතේ ඇතැම් වගන්ති සම්බන්ධයෙන් පෙත්සම්කරුවන් සිය කංස්සාව පළ කර ඇත.
නොවැම්බර් 04 වැනිදා පැවැති පූර්ව නඩු විභාගයේදී පෙත්සම්කරුවන් වෙනුවෙන් පෙනී සිටි නීතිඥවරුන් සිය කරුණු දැක්වීම් ඉදිරිපත් කළ අතර, එම කටයුතු එදින රාත්‍රී වන තෙක් පැවැත්විණි.
පනත් කෙටුම්පතේ සහ යෝජිත සංශෝධනවල ආණ්ඩුක්‍රම ව්‍යවස්ථානුකූලභාවය පිළිබඳ ලිඛිත දේශන නොවැම්බර් 05 වැනිදාට පෙර ගොනු කරන ලෙස ශ්‍රේෂ්ඨාධිකරණය පසුව පෙත්සම්කරුවන්ට නියෝග කළේය.