නිල විදේශ සංචිත ඩොලර් බිලියන 7.09ක් දක්වා ඉහළට!

ශ්‍රී ලංකා මහ බැංකුව (CBSL) විසින් නිකුත් කරන ලද නවතම සතිපතා ආර්ථික දර්ශක වාර්තාවට අනුව, 2026 ඔක්තෝබර් මාසය අවසානයේදී ශ්‍රී ලංකාවේ නිල සංචිත ප්‍රමාණය (gross official reserves) ඇමරිකානු ඩොලර් බිලියන 7.09 දක්වා ළඟා වී ඇත.
ඔක්තෝබර් මාසය අවසන් වන විට නිල සංචිත ප්‍රමාණය ඇමරිකානු ඩොලර් මිලියන 7,086ක් ලෙස තාවකාලිකව ඇස්තමේන්තු කර ඇති බව මහ බැංකුව පැවසීය.
මෙම සංචිත අගයට චීන මහජන බැංකුව (People’s Bank of China) සමඟ ඇති කරගත් මුදල් හුවමාරු (swap) ගිවිසුමෙන් ලැබුණු මුදල් ද ඇතුළත් වේ.
මේ අතර, ඔක්තෝබර් මාසය තුළ දේශීය විදේශ විනිමය වෙළඳපොළෙන් ඇමරිකානු ඩොලර් මිලියන 191ක ශුද්ධ විදේශ විනිමය මිලදී ගැනීමක් සිදු කර ඇති බව ද මහ බැංකුව වාර්තා කළේය.
සංචිත මට්ටම යහපත් මට්ටමක පැවතුණද, 2026 නොවැම්බර් 06 වන දින වන විට ශ්‍රී ලංකා රුපියල ඇමරිකානු ඩොලරයට සාපේක්ෂව වසර ආරම්භයේ සිට මේ දක්වා 6.7%ක අවප්‍රමාණය වීමක් වාර්තා කර ඇත.
නොවැම්බර් 06 වන දින නිකුත් කරන ලද මහ බැංකුවේ සතිපතා ආර්ථික දර්ශක වාර්තාවේ මෙම දත්ත ප්‍රකාශයට පත් කර තිබේ.