ඇහැලියගොඩ ‍පොලිස් ස්ථානාධිපතිට ඇප

රත්නපුර කොට්ඨාස අපරාධ විමර්ශන කාර්යාංශය විසින් අත්අඩංගුවට ගෙන අධිකරණයට ඉදිරිපත් කළ ඇහැලියගොඩ ‍පොලිස් ස්ථානයේ ස්ථානාධිපතිවරයා ඇප මත මුදාහැර තිබේ.

ඔහු අවිස්සාවේල්ල මහෙස්ත්‍රාත් අධිකරණයට ඊයේ (04) ඉදිරිපත්කළ අවස්ථාවේදී මෙම නියෝගය ලබාදී ඇත.

ස්ථානාධිපතිවරයා ලක්ෂ 10 බැගින් වූ ශරීර ඇප 3ක් මත මුදාහැර ඇති අතර, විදෙස් ගමන් තහනමක්ද පනවා තිබේ. ඊට අමතරව පැමිණිලිකරුවන්ට බලපෑම් නොකරන ලෙසටද නියෝගය කර ඇත.

මැණික් ගලක් සොරාගැනීමක් සම්බන්ධයෙන් ලද පැමිණිල්ලක් විමර්ශනයේදී සාක්ෂිකරුවන් හා සැකකරුවන්ට අයත් මුදල් බලෙන් ලබාගෙන විමර්ශන කටයුතු සිදු නොකිරීමේ චෝදනාවකට අදාළව ඔහු ඉකුත් බදාදා (03) අත්අඩංගුවට ගනු ලැබීය.