ජාතික කලාභවනේ පෞරාණික සිතුවම් 42ක් අතුරුදන්

ජාතික කලාභවනේ තිබූ පෞරාණික සිතුවම් 42 අස්ථානගත වී ඇති බව බුද්ධශාසන, ආගමික හා සංස්කෘතික කටයුතු අමාත්‍ය හිනිදුම සුනිල් සෙ‍නෙවි මහතා පවසයි.

ඊයේ දින (21) පාර්ලිමේන්තුවේ දී වාචික ප්‍රශ්න සඳහා පිළිතුරු ලබාදෙමින් අමාත්‍යවරයා මේ බව කියා සිටියේය.

භාණ්ඩ සමීක්ෂණ මණ්ඩලයක් විසින් 2015 වසරේ දී ජාතික කලා භවනේ චිත්‍ර හා මූර්ති සමීක්ෂණය කිරීමෙන් අනතුරුව මෙම අතුරුදන් වීම සම්බන්ධයෙන් තොරතුරු වාර්තා වී තිබේ.

ඒ අනුව තොග පොතෙහි සඳහන්ව තිබූ මුළු සිතුවම් සංඛ්‍යාව 281ක් වුවත් කලා භවනේ මේ වනවිට ඇත්තේ, සිතුවම් 239ක් පමණක් බව අමාත්‍යවරයා සඳහන් කළේය.

මේ සම්බන්ධයෙන් අමාත්‍යංශයෙන් පත් කළ කමිටුවක් විසින් පරීක්ෂණයක් සිදු කෙරෙමින් පවතින බව අමාත්‍යවරයා වැඩිදුරටත් අවධාරණය කළේය.