වියළි පළතුරු පැකට්වල කෝටි 2කට අධික කුෂ් රැගත් අයෙක් අත්අඩංගුවට

රුපියල් මිලියන 25ක පමණ වටිනාකමකින් යුත් කුෂ් ග්‍රෑම් 2,505ක් සමග ශ්‍රී ලාංකික ගුවන් මගියෙකු කටුනායක ගුවන්තොටුපොළේදී අත්අඩංගුවට ගෙන තිබේ.

බැංකොක් සිට පැමිණ ඇති කොළඹ පදිංචි 33 හැවිරිදි පුද්ගලයෙකු වන අතර, අදාළ සැකකරු ඡායාරූප ශිල්පියෙකු බවද සඳහන්ය.

ඔහු හරිත මාර්ගය හරහා පිටවීමට තැත්කිරීමේදී රේගු මත්ද්‍රව්‍ය පාලන අංශයේ නිලදාරීන්ට ඇතිවූ සැකයක් මත පරීක්ෂා කිරීමේදී, ඔහුගේ ගමන් මල්ලක් තුල ඉතා සූක්ෂමව මෙම කුෂ් තොගය අසුරා තිබියදී සොයාගැනීමට හැකිව ඇත.

අදාළ කුෂ් තොගය වියළි පලතුරැ පැකට් තුළ, වියළි පලතුරැ ඉවත්කොට අසුරා තිබී ඇත.

වැඩිදුර විමර්ශන සඳහා කුෂ් තොගය සමග සැකකරු ගුවන්තොටුපොළ පොලිස් මත්ද්‍රව්‍ය නිවාරණ කාර්යාලය වෙත භාරදීමට නියමිතය.