ලංගම ඉතිහාසයේ නව වාර්තාවක්; දවස් 6ට ලැබුණු ආදායම

අලුත් අවුරුදු සේවා සැපයීමෙන් ලංකා ගමනා ගමන මණ්ඩලයට දින 6ක් තුළ රුපියල් බිලියනයක ආදායමක් හිමි වූ බව එහි සභාපති සජීව නන්දන කනගරත්න මහතා පවසනවා.

අද (15) පැවති ප්‍රවෘත්ති සාකච්ඡාවකදී ඔහු සඳහන් කළේ, අලුත් අවුරුද්දට ගම්බිම් බලා යාමට පැමිණි ජනතාවට සේවා සැපයීම තුළින් එම ආදායම හිමිකර ගත් බවයි.

ඒ අනුව පසුගිය 11 වනදා ඉතිහාසයේ වැඩිම අදායම ඉපයූ දිනය ලෙස වාර්තාගත වන අතර එම සංඛ්‍යාව රුපියල් මිලියන 213ක් වන බව ලංකා ගමනා ගමන මණ්ඩලයේ සභාපති සජීව නන්දන කනගරත්න මහතා සඳහන් කළා.

මේ අතර අලුත් අවුරුදු සමයේ ගම්බිම් බලා පිටත්ව ගිය ජනතාවට නැවත කොළඹ සහ ප්‍රධාන නගර වෙත පැමිණීමට අද සිට විශේෂ බස් රථ සේවා ක්‍රියාත්මක කරන බව ජාතික ගමනා ගමන කොමිෂන් සභාව පවසනවා.

එහි අධ්‍යක්ෂ ජනරාල් නිලාන් මිරැන්ඩා මහතා සඳහන් කළේ කොළඹ සිට පෞද්ගලික බස් රථ යොදා ගනිමින් මගීන් ලක්ෂ 4කට අධික සංඛ්‍යාවක් අලුත් අවුරුදු සඳහා ගම්බිම් බලා ගොස් ඇති බවයි.

ඔහු වැඩිදුරටත් සඳහන් කළේ, බස් රථවල අධික ලෙස මුදල් අය කරනු ලබන්නේ නම් ඒ සම්බන්ධයෙන් ජාතික ගමනා ගමන කොමිෂන් සභාවේ ක්ෂණික දුරකථන අංකය වන 1955 අමතා පැමිණිලි සිදු කළ හැකි බවයි.

මේ අතර, ගම්බිම් බලා ගොස් සිටින ජනතාවගේ ප්‍රවාහන පහසුකම් සැපයීමට බස් රථ 4000ට වැඩි සංඛ්‍යාවක් යොදවා ඇති බව ලංකා පෞද්ගලික බස් රථ හිමියන්ගේ සංගමයේ සභාපති ගැමුණු විජේරත්න මහතා කියා සිටියා.