දත්ත ආරක්ෂණ අධිකාරියේ නව අධ්‍යක්ෂ ජනරාල් ධූරයට දිමුත් භාෂිත අතපත්තු

ශ්‍රී ලංකා පරිපාලන සේවයේ නිලධාරියෙකු වන දිමුත් භාෂිත අතපත්තු මහතා 2026 මාර්තු 05වැනිදා සිට බලපැවැත්වෙන පරිදි දත්ත ආරක්ෂණ අධිකාරියේ (DPA) අධ්‍යක්ෂ ජනරාල් ලෙස පත් කර ඇත.

මෙම අධිකාරිය සඳහා ස්ථිර අධ්‍යක්ෂ ජනරාල්වරයෙකු පත් කිරීම ශ්‍රී ලංකාවේ පුද්ගලික දත්ත ආරක්ෂාව සම්බන්ධ නියාමනය ශක්තිමත් කිරීමේ සහ මෑතකදී සංශෝධනය කරන ලද 2022 අංක 9 දරන පෞද්ගලික දත්ත ආරක්ෂණ පනතේ දක්වා ඇති පෞද්ගලිකත්ව ආරක්ෂණ රාමුව බලාත්මක කිරීමේ වැදගත් පියවරක් සනිටුහන් කරයි.

දත්ත ආරක්ෂණ අධිකාරියේ අධ්‍යක්ෂ මණ්ඩලය අලුතින් පත් කරන ලද අධ්‍යක්ෂ ජනරාල්වරයා පිළිගන්නා අතර, ඔහු අධිකාරියේ උපායමාර්ගික සහ පරිපාලනමය කාර්යයන් සඳහා නායකත්වය සැපයීමට දායක වනු ඇත. පෞද්ගලික දත්ත ආරක්ෂණ පනතේ විධිවිධාන බලාත්මක කිරීමේ දිනයන් ප්‍රකාශයට පත් කිරීම, දත්ත ආරක්ෂණ නීති ක්‍රියාත්මක කිරීම සඳහා මාර්ගෝපදේශ සංවර්ධනය කිරීම සහ රජයේ සහ රාජ්‍ය නොවන අංශයන්හි දත්ත පාලකයින් සහ සැකසුම්කරුවන්ගේ ධාරිතා වර්ධනය ද ඊට ඇතුළත් වේ.

මෙම පත්වීමට පෙර, අතපත්තු මහතා ඩිජිටල් ආර්ථික අමාත්‍යාංශයේ වාණිජකරණය සහ හවුල්කාරිත්ව කටයුතු භාර අධ්‍යක්ෂවරයා ලෙස සේවය කරන ලදි. ඔහුගේ පූර්ව සේවා ස්ථාන අතර ආරක්ෂක අමාත්‍යාංශය, මෝටර් රථ ප්‍රවාහන දෙපාර්තමේන්තුව, මිනිස් බල හා රැකියා දෙපාර්තමේන්තුව, එක්සත් රාජධානියේ බෙල්ෆාස්ට්හි ක්වීන්ස් විශ්ව විද්‍යාලය සහ Virtusa සමාගම (කොළඹ සහ බෙල්ෆාස්ට්, එක්සත් රාජධානිය) ඇතුළත් වේ. ඔහු ශ්‍රී ලංකා පරිගණක හදිසි ප්‍රතිචාර සංසදයේ (CERT) සහ LK Domain Registry අධ්‍යක්ෂ මණ්ඩල සාමාජිකයකු ලෙස ද කටයුතු කරයි.

දිමුත් භාෂිත අතපත්තු මහතා කොළඹ විශ්ව විද්‍යාලයේ පරිගණක අධ්‍යයන ආයතනයෙන් (UCSC) පරිගණක විද්‍යාවේදී උපාධියක් ද, මෙල්බන් විශ්ව විද්‍යාලයෙන් තොරතුරු පද්ධති පිළිබඳ ශාස්ත්‍රපති උපාධියක් සහ ශ්‍රී ජයවර්ධනපුර විශ්ව විද්‍යාලයේ කළමනාකරණය පිළිබඳ පශ්චාත් උපාධි ආයතනය (PIM) වෙතින් රාජ්‍ය පරිපාලනය පිළිබඳ ශාස්ත්‍රපති උපාධියක් ලබා ඇත.

ඔහුගේ නව නායකත්වය යටතේ, දත්ත ආරක්ෂණ අධිකාරිය විසින් රජයේ ඩිජිටල් ආර්ථික සැලැස්මේ දක්වා ඇති පරිදි ආරක්ෂිත සහ වගකිව යුතු පුද්ගලික දත්ත නියාමන සංස්කෘතියක් ප්‍රර්ව ධනය කිරීමෙන් ශ්‍රී ලංකාව තුළ ඩිජිටල් විශ්වාසය තවදුරටත් වැඩි දියුණු කරනු ඇතැයි අපේක්ෂා කෙරේ.