රන් මිල තවත් ඉහළට

ලෝක වෙළෙඳපොළ තුළ රත්‍රං සහ රිදී මිල කැපී පෙනෙන ලෙස ඉහළ ගොස් තිබේ.

ඒ අනුව ලොව ප්‍රධාන වෙළෙඳපොළ තුළ රත්රන් මිල අමෙරිකානු ඩොලර් 4,729ක් ඉක්මවා ගොස් තිබූ අතර රිදී අවුන්සයක මිලද ඩොලර් 95.86 අගයක සටහන්ව තිබුණි.

ගෙවුණු කාලය තුළ අවස්ථා කිහිපයකදීම ලෝක වෙළෙඳපොළ තුළ රන් සහ රිදී මිල වේගයෙන් ඉහළ යනු නිරීක්ෂණය වුණි.

මේ වනවිට නැවතත් රන් සහ රිදී මිල කැපී පෙනෙන ලෙස ඉහළ ගොස් ඇතැයි විදෙස් මාධ්‍ය වාර්තා කර තිබේ.
එවන් පසුබිමක මෙරට රත්‍රං මිලද ඉහළ ගොස් තිබේ.

කොළඹ හෙට්ටිවීදිය රත්‍රං වෙළෙඳපොළ ආරංචි මාර්ග අනුව, මෙරට රත්‍රං මිල ඊයේ (20) උදෑසන 8ට සාපේක්ෂව රුපියල් 2,000කින් ඉහළ ගොස් ඇත.

ඒ අනුව ඊයේ (20) පස්වරුවේ කොළඹ හෙට්ටිවීදිය රන් වෙළෙඳපොළෙහි “කැරට් 22” රන් පවුමක මිල රු.342,200ක් ලෙස දැක්වුණි.

මේ අතර ඊයේ දිනයේ දී රු.368,000ක් ලෙස පැවති “කැරට් 24” රන් පවුමක මිල ඊයේ (20) වනවිට රු.370,000ක් දක්වා ඉහළ ගොස් ඇති බව කොළඹ හෙට්ටිවීදිය රත්‍රං වෙළෙඳපොළ ආරංචි මාර්ග සඳහන් කරයි.