ට්රම්ප් වෙනිසියුලාවෙන් බොරතෙල් බැරල් මිලියන 50ක් ඉල්ලයි
ට්රම්ප් වෙනිසියුලාවෙන් බොරතෙල් බැරල් මිලියන 50ක් ඉල්ලයි
ඉදිරි මාස 18ක කාලසීමාවකදී වෙනිසියුලාවේ තෙල් වෙළෙඳාම අමෙරිකාව සතුව පවතිනු ඇතැයි ජනාධිපති ඩොනල්ඩ් ට්රම්ප් ප්රකාශ කළ බව විදෙස් මාධ්ය වාර්තා කරයි.
එම කාලය ඇතුළත වෙනිසියුලාවේ තෙල් වෙළෙඳාම සඳහා විශාල ආයෝජනයක් සිදු කිරීම ට්රම්ප්ගේ අපේක්ෂාව වී ඇතැයි විදෙස් මාධ්ය වැඩිදුරටත් වාර්තා කරයි. වෙනිසියුලාවේ අන්තර්වාර රජය සම්බාධකවලට ලක්වූ උසස් තත්වයේ බොරතෙල් බැරල් මිලියන 30ක්, 50ක් අතර ප්රමාණයක් අමෙරිකාවට ලබාදෙනු ඇති බවත්, එම බොරතෙල් වෙළෙඳපොළේ පවතින මිලට අලෙවි කර එහි ආදායම වෙනිසියුලාවේ සහ අමෙරිකාවේ ජනතාවගේ යහපත සඳහා යොදවන බවත් ඔහු ටෘත් සමාජ මාධ්ය ජාලයේ සඳහන් කර තිබේ. එම කටයුතු සිය පාලනය යටතේ සිදුකරන බවද ඩොනල්ඩ් ට්රම්ප් ප්රකාශ කර ඇතැයි වාර්තා වේ.
චිනය, රුසියාව, ඉරානය සහ කියුබාව සමඟ පවතින ආර්ථික සම්බන්ධතා නවත්වන ලෙසටද අමෙරිකානු ජනාධිපතිවරයා වෙනිසියුලාවේ අන්තර්වාර රජයට දැනුම් දී ඇති අතර, එම රටවලට බොරතෙල් අලෙවි කිරීමෙන් වළකින ලෙසට අනතුරු අඟවා ඇතැයි ද විදෙස් මාධ්ය සඳහන් කරයි.
වෙනිසියුලාව සමඟ දිගුකාලීන සම්බන්ධතා පවතින චීනය එරට විශාලතම බොරතෙල් ගැනුම්කරු ද වන අතර, ඩොනල්ඩ් ට්රම්ප්ගේ ප්රකාශය සම්බන්ධයෙන් මෙතෙක් ප්රතිචාර දක්වා නැතැයි ද වාර්තා වේ. අමෙරිකාව විසින් පනවනු ලැබූ සම්බාධක හේතුවෙන් වෙනිසියුලාවේ බොරතෙල් වෙළෙඳාම මේ වන විට දැඩි අර්බුදයකට ලක්වී ඇති අතර, තවදුරටත් බොරතෙල් නිෂ්පාදනය කිරීම දුෂ්කර වී ඇති බැවින් පසුගිය දෙසැම්බරයේ සිට බොරතෙල් ළිං වසා දැමීම ආරම්භ කර තිබූ බව ද වාර්තා වේ.
About The Author
