මීනගයා දුම්රියේ ගැටී අලි 7 දෙනෙකු මියයාම ගැන රියදුරුට එරෙහිව පෙත්සමක්

හබරණ ප්‍රදේශයේදී මීනගයා දුම්රියේ හැපී වනඅලි හත් නෙකු මියයාමේ සිද්ධියට සම්බන්ධ 67 වියැති දුම්රිය රියදුරුට එරෙහිව නීතිමය පියවර ගන්නා ලෙස දුම්රිය සාමාන්‍යාධිකාරීවරයා ඇතුළු බලධාරීන්ට නියෝග කරන ලෙස ඉල්ලා පරිසර ක්‍රියාකාරිකයන් පිරිසක් විසින් ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනුකර තිබෙනවා.

පෙත්සම්කරුවන් පෙන්වාදෙන්නේ මෙම සිද්ධියට සම්බන්ධ දුම්රිය රියදුරන්ට එරෙහිව මෙතෙක් කිසිදු විනය පියවරක් ගෙන නොමැති අතර ඔහු මේ වනවිටත් අඛණ්ඩව සේවයේ යෙදී සිටින බවයි.

වන අලින් දුම්රියේ ගැටී මියයාමේ සිද්ධි සම්බන්ධයෙන් විධිමත් පරීක්ෂණයක් පවත්වා එම දුම්රිය රියදුරුට සහ එම සිද්ධියට අදාළ සේවකයන්ට එරෙහි විනය පියවර ගන්නා ලෙස දුම්රිය බලධාරීන්ට නියම කරන ලෙස පෙත්සම මගින් ඉල්ලා තිබෙනවා.

මෙම පෙත්සම පරිසර ක්‍රියාකාරීන් පිරිසක් වන කේ ප්‍රියදර්ශනී එස්.ආර්. අදිකාරම්, එල්.ඒ. ආර් චන්ද්‍රශාන්ත, අනූෂා ඩේවිඩ්, එල්.වී.ජේ.චන්ද්‍රශාන්ත යන අය විසින් ගොනුකර තිබුණා.

දුම්රිය සාමාන්‍යාධිකාරීවරයා, ප්‍රවාහන සහ මාර්ග අමාත්‍යාංශ ලේකම්වරයා, වනජීවී අධ්‍යක්ෂ ජෙනරාල්වරයා, පරිසර ඇමතිවරයා, ප්‍රවාහන ඇමතිවරයා ඇතුළු දොළොස් දෙනෙක් මෙම පෙත්සමයෙහි වග උත්තරකරුවන් ලෙස නම්කර සිටිනවා.

කොළඹ මඩකලපුව දුම්රිය මාර්ගයේදී ධාවනය වූ මීනගයා දුම්රියට ඉකුත් පෙබරවාරි මස 19 වැනිදා අලින් හත්දෙනෙකු ගැටුණු බව පෙත්සම්කරුවන් පෙන්වාදෙනවා.

එම ස්ථානයේදීම අලින් හයදෙනෙකු මිය ගිය අතර තුවාල ලැබූ අලි පැටවකු පසුව මියගිය බවද පෙත්සම්කරුවන් පවසනවා.

එසේම මාර්තු මස තුන්වැනිදා, මැයි මස දෙවැනිදා සහ ඉකුත් අගෝස්තු මස 07 වැනිදා තවත් අලින් මෙලෙස දුම්රියේ ගැටී ජීවිතක්ෂයට පත් වූ බවද පෙත්සම්කරුවන් විසින් පෙන්වා දී තිබේ.

මෙලෙස දිනෙන් දින අලි මරණ, අලින් දුම්රියේ ගැටී සිදුවන මරණ ඉහළ ගියද එය වළක්වා ගැනීමට දුම්රිය බලධාරීන් මෙන්ම වන සංරක්ෂණ දෙපාර්තමේන්තුවද මෙතෙක් අසමත් වී ඇති බවට පෙත්සම්කරුවන් චෝදනා කෙරේ.

2023 වසරේදී අලි මරණ 488ක් සිදුවී ඇති අතර ඉන් 24ක් දුම්රිය ගැටී සිදුවූ ඒවා බවද 2024 වසරේදී අලි මරණ 386ක් සිදුවී ඇතිව අතර ඉන් එකොළහක් දුම්රිය ගැටී සිදුවූ ඒවා බවද පෙත්සම්කරුවන් පෙන්වා දේ.

දිනෙන් දින ඉහළ යන අලි මරණ වළක්වා ගැනීම සඳහා ගන්නා ක්‍රියාමාර්ග සහ පියවර සම්බන්ධයෙන් වන වාර්තාවක් මාස තුනක කාලයකදී අධිකරණයට ඉදිරිපත් කරන ලෙස දුම්රිය සාමාන්‍යාධිකාරීවරයාට නියම කරන ලෙසද පෙත්සම්කරුවන් අධිකරණයෙන් ඉල්ලා සිටියි.

එසේම විශ්‍රාම වයස ඉක්මවූ දුම්රිය රියදුරන් ගල්ඔය දුම්රිය හන්දියේ සිට මඩකලපුව දුම්රිය ස්ථානය තෙක් ධාවනය වන දුම්රියවලට සහ ගල්ඔය දුම්රිය හන්දියේ සිට ත්‍රිකුණාමලය දුම්රිය ස්ථානයත් අතර ධාවනය වෙන දුම්රියන්හි සේවයේ යෙදවීමෙන් වලක්වන අතුරු නියෝගයක් දුම්රිය සාමාන්‍යාධිකාරීවරයා වෙත නිකුත් ලෙසද පෙත්සම මගින් ඉල්ලා තිබේ.