රෝහල්වලදී වැඩිම රෝගීන් ප්‍රමාණයක් මියයන්නේ සෙප්සිස් තත්ත්වයෙන් – විශේෂඥ වෛද්‍ය විනෝදනී වනිගසේකර
රෝහල්වලදී වැඩිම රෝගීන් ප්‍රමාණයක් මියයන්නේ සෙප්සිස් තත්ත්වයෙන් - විශේෂඥ වෛද්‍ය විනෝදනී වනිගසේකර
ගෝලීය දත්ත අනුව රෝහල්වලදී වැඩිම රෝගීන් ප්‍රමාණයක් මියයන්නේ සෙප්සිස් රෝග තත්ත්වයෙන් බවත් ශ්‍රී ලංකාවේද තත්ත්වය ඊට සමාන වුවත් ඒ පිළිබඳ දත්ත නොමැතිවීම විශාල ගැටලුවක් යැයි නිර්වින්දන හා දැඩි සත්කාර විශේෂඥවරුන්ගේ විද්‍යායතනයේ සභාපති, කොළඹ ජාතික රෝහලේ නිර්වින්දන විශේෂඥ වෛද්‍ය විනෝදනී වනිගසේකර පැවසුවාය.
ගෝලීය වශයෙන් වසරකදී මිලියන 47-50ක ප්‍රමාණයක් සෙප්සිස් තත්ත්වයට ගොදුරු වන බවත් එම රෝගීන්ගෙන් මිලියන 11ක් මියයන බවත් ඇය පෙන්වා දුන්නාය. සෙප්සිස් තත්ත්වයකදී රෝගීන්ට රෝහලේදී හෘදයාබාධ මෙන් හදිසි තත්ත්වයක් ලෙස සලකා ප්‍රතිකාර කරන බවද ඇය පැවසුවාය. විෂබීජ, දිලීර, බැක්ටීරියා සහ ක්ෂ්‍රද්‍රජීවී ආසාදනයක් හේතුවෙන් ශරීරයේ ප්‍රතිශක්තිකරණය අඩුකමින් ඒවා ශරීරය පුරා වර්ධනය වීම සෙප්සිස් තත්ත්වය ලෙස හඳුන්වන බවත් ජනතාවට මෙන්ම සෞඛ්‍ය අංශයටද මේ රෝග තත්ත්වය පිළිබඳ දැනුම්වත්භාවය ඉතාම අල්ප බවත් ඇය සඳහන් කළාය. ලෝක සෙප්සිස් දිනය සැප්තැම්බර් 13දාට යෙදීම නිමිත්තෙන් සෞඛ්‍ය ප්‍රවර්ධන කාර්යාංශයේ(10) පැවැති ප්‍රවෘත්ති සාකච්ඡාවේදී මේ බව ඇය පැවසුවාය.
ගෝලීය සෙප්සිස් සන්ධානය අනුගාමීව ශ්‍රී ලංකා නිර්වින්දන විශේෂඥ වෛද්‍යවරුන්ගේ සංගමය, දැඩි සත්කාර වෛද්‍යවරුන්ගේ සංගමය සහ ක්ෂුද්‍රජීව විශේෂඥ වෛද්‍යවරුන්ගේ සංගමය එක්ව ශ්‍රී ලංකා සෞඛ්‍ය අමාත්‍යාංශය යටතේ ශ්‍රී ලංකාවේ සෙප්සිස් සංගමය 2023දී පිහිටුවීය. මේ සංගමයට ලැබෙන ප්‍රදානයන්ගේ පවතින අඩුවෙන් ජනතාව දැනුම්වත් කිරීම ඉතා මන්දගාමීව සිදුවන බවද ඇය පෙන්වා දුන්නාය.
දියවැඩියාව, වකුගඩු රෝගය, තුවාලයකින්, කටුවක් ඇනීමෙන්, ශ්වසනය සහ මුඛයෙන් සිදුවන විෂ ශරීරගත වීමකින් හටගන්නා ආසාදනයක් තවදුරටත් වර්ධනය වීමෙන් සෙප්සිස් තත්ත්වය ඇති වන බවද ඇය සඳහන් කළාය.
About The Author
