රාජ්‍ය අංශයේ සියලුම වෙබ් අඩවි ලබන වසරේ සම්පූර්ණයෙන්ම ප්‍රමිතිගත කිරීමට පියවර

සයිබර් ආරක්ෂණ ප්‍රතිසංස්කරණ ඇතුළුව ඩිජිටල් ප්‍රතිසංස්කරණයේ පියවරක් ලෙස ඉදිරි වසර තුළ රාජ්‍ය අංශයේ සියලුම වෙබ් අඩවි සම්පූර්ණයෙන්ම ප්‍රමිතිගත කිරීමර රජය සැලසුම් කර තිබේ.

රජයේ සියලුම වෙබ් අඩවි මාස හයේ සිට අවුරුද්දක් ඇතුළත ක්‍රියාකාරී ලෙස ප්‍රමිතිගත කිරීමට අපේක්ෂා කරන බව ඩිජිටල් ආර්ථික අමාත්‍යාංශයේ වැඩබලන ලේකම් වරුණ ශ්‍රී ධනපාල මහතා පැවසීය.

කෘත්‍රිම බුද්ධියෙන් (AI) ක්‍රියාත්මක වන රජයේ cloud මධ්‍යස්ථානයක් ලෙස පරිවර්තනය වීම සඳහා වන දිගුකාලීන සැලසුම් සහිතව, රාජ්‍ය අංශයේ සියලුම වේදිකා Lanka Government Cloud 2.0 වෙත මාරු කරන බව ඔහු තහවුරු කළේය.

ලෝක බැංකුව සහ යුරෝපීය සංවර්ධන හවුල්කරුවන් (EDP) ඇතුළු ගෝලීය හවුල්කරුවන් සමඟ සහයෝගයෙන් මෙම පරිවර්තනය සිදු කරයි.

3 වැනි අදියරේ Cloud සේවා සපයන්නෙකු හරහා රජයේ වේදිකා කළමනාකරණය කිරීම මූලිකව ආරම්භ කරනු ඇත.

නව සැපයුම්කරු ලබන සතියේ මුල් භාගයේදී වගකීම් භාර ගැනීමට නියමිතය.

gov.lk යටතේ ලියාපදිංචි කර ඇති රජයේ වෙබ් අඩවි 700න් අඩක් පමණ 2014 සිට අක්‍රිය හෝ යාවත්කාලීන කර නොමැති බවට සොයාගැනීමෙන් පසුව මෙම වැඩසටහන ආරම්භ කෙරිණි.

එසේ නොකළහොත් කීර්ති නාමයට සහ ආරක්ෂාව යන දෙකටම අවදානමක් ඇති කරන බව ධනපාල පිළිගත්තේය.

රජයේ තොරතුරු තාක්ෂණ සේවා කාර්ය මණ්ඩල හිඟය ඇතුළු සම්පත් සීමාවන් වැඩසටහනේ ප්‍රගතිය මන්දගාමී කර ඇත.

කෙසේවෙතත්, ඩිජිටල් යටිතල පහසුකම් යථා තත්ත්වයට පත් කිරීම සහ නවීකරණය කිරීම සඳහා පවතින සම්පත් සමඟ වැඩ කිරීමට අමාත්‍යාංශය කැපවී සිටින බව ඔහු සඳහන් කළේය.

මහජන ආරක්ෂක අමාත්‍යාංශය ඉලක්ක කරගත් ප්‍රහාරයක් ඇතුළුව මෑත කාලීනව මුහුණ දුන් සයිබර් ප්‍රහාර මෙම වැඩසටහන කඩිනම් කිරීමට හේතු විය.

ගැටලුවට පිළියමක් ලෙස වැඩිදියුණු කළ ෆයර්වෝල් ක්‍රියාත්මක කිරීමට ඩිජිටල් ආර්ථික අමාත්‍යාංශය පියවර ගෙන තිබේ.

සැප්තැම්බර් වන විට ජාතික මට්ටමින් සම්පූර්ණයෙන්ම ක්‍රියාත්මක වන ජාතික සයිබර් ආරක්ෂක මෙහෙයුම් මධ්‍යස්ථානයක් නිර්මාණය කිරීමට කැබිනට් මණ්ඩලය අනුමැතිය ලබා දී ඇත.