බංග්ලාදේශයේ හමුදා බුද්ධි අංශය විසුරුවා හැරීමට පියවර
බංග්ලාදේශයේ ඉහළම හමුදා බුද්ධි අංශය වන හමුදා බුද්ධි ඒකකය විසුරුවා හැරීමට එරට අන්තර්වාර රජය පියවර ගෙන ඇතැයි විදෙස් මාධ්‍ය වාර්තා කරයි.
ඉස්ලාම් හිතවාදියකු ලෙස ප්‍රකට බංග්ලාදේශ අන්තර්වාර රජයේ ප්‍රධානි මොහොමඩ් යූනුස්ගේ තීරණයක් මත එම පියවර ගෙන ඇතැයිද, එරට ඇෆ්ගනිස්තානය මෙන් රැඩිකල් ඉස්ලාමීය රාජ්‍යයක් බවට පත් කිරීම අන්තර්වාර රජයේ අපේක්ෂාව වී ඇතැයිද විදෙස් මාධ්‍ය වැඩිදුරටත් වාර්තා කරයි.
බංග්ලාදේශ අන්තර්වාර රජය එවැනි පියවරක් අනුගමනය කිරීම දේශීය හා ජාත්‍යන්තර වශයෙන් දැඩි අවධානයට ලක්වී ඇති බවත්, එය සන්නද්ධ හමුදා දුර්වල කිරීමේ සහ රටේ ප්‍රජාතන්ත්‍රවාදය මර්දනය කිරීමේ ක්‍රියාමාර්ගයක එක් පියවරක් බවට විපක්ෂය චෝදනා කර ඇති බවත් විදෙස් මාධ්‍ය සඳහන් කරයි.
බංග්ලාදේශ හමුදා බුද්ධි අංශය විසුරුවා හැරීමට දින කිහිපයකට පෙර පාකිස්තාන හමුදාවේ ඉහළ නිලධාරීන් තිදෙනකු එරට සංචාරයක නිරතවීම සම්බන්ධයෙන්ද විපක්ෂයේ අවධානය යොමුවී ඇති අතර, හමුදා බුද්ධි අංශය විසුරුවා හැරීමෙන් ජාත්‍යන්තර ත්‍රස්තවාදයට බංග්ලාදේශයේ දොරටු විවර වී ඇතැයි එරට විපක්ෂය චෝදනා එල්ල කළ බව වැඩිදුරටත් වාර්තා වේ.
About The Author
