ශාන්තිපුර ඊගල්ස් නැරඹුම් ස්ථානය(Eagle’s View Point) දෙස් විදෙස් සංචාරකයින් සඳහා විවෘත වේ

නුවරඑළිය, ශාන්තිපුර ඊගල්ස් නැරඹුම් ස්ථානය (Eagle’s View Point) දෙස් විදෙස් සංචාරකයින් සඳහා විවෘත කර තිබේ.

එම නැරඹුම් ස්ථානය මුහුදු මට්ටමේ සිට අඩි 6182 පමණ උසකින් පිහිටි ලංකාවේ උසම ගම්මානය වන ශාන්තිපුර ගම්මානය කේන්ද්‍ර කරගනිමින් ඉදිකර ඇත.

මෙම නැරඹුම් ස්ථානය විවෘතකිරීම විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතාගේ ප්‍රධානත්වයෙන් සහ ගුවන් හමුදාධිපති එයාර් මාර්ෂල් උදේනි රාජපක්ෂ මහතාගේ සහභාගිත්වයෙන් ඊයේ දින (26) සිදුකරන ලදී.

සංචාරක කර්මාන්තයේ දියුණුව තුළින් දේශීය ආර්ථිකයේ යහපැවැත්ම උදෙසා ශ්‍රී ලංකාව විදේශීය සංචාරකයින්ගේ ප්‍රධාන සහ ආකර්ෂණීය ගමනාන්තයක් බවට පත්කරලීම මූලික අරමුණු කරගනිමින් මෙම ඉදිකර ඇත.

2024 ජූලි මස 31වන දින ඉදිකිරීම් ආරම්භ කරනු ලැබු මෙම ඊගල්ස් නැරඹුම් ස්ථානයේ ඉදිකිරිම් කටයුතු සඳහා ශ්‍රම දායකත්වය සහ ඉංජිනේරු සහාය සැලසුම් කිරිම ශ්‍රී ලංකා ගුවන් හමුදාව විසින් සිදු කළේය.

ඒ සඳහා මුල්‍ය දායකත්වය සංචාරක සංවර්ධන අධිකාරිය විසින් සපයනු ලැබීය.

මෙම ‘ඊගල්ස් නැරඹුම් ස්ථානයේ සිට සංචාරකයින්හට නුවරඑළිය නගරය, පේදුරු තැන්න, පිදුරුතලාගල, හග්ගල, ග්‍රෙගරි වැව, කිකිළියාමාන්න කදු පංතිය, ශ්‍රීපාදය, සප්තකන්‍යා කදුවැටිය ඇතුළු ඌව පළාතේ සොබාදහමේ සුන්දරත්වයද නැරඹීමේ හැකියාව පවතී.