ඉම්රාන්ට නිදහස ඉල්ලා ලක්ෂ සංඛ්‍යාත ජනතාව අගනුවරට; ලොව පුරා ස්ථාන 60ක විරෝධතා
ඉම්රාන්ට නිදහස ඉල්ලා ලක්ෂ සංඛ්‍යාත ජනතාව අගනුවරට; ලොව පුරා ස්ථාන 60ක විරෝධතා
සිරගත කර සිටින පාකිස්තානයේ හිටපු අගමැති ඉම්රාන් ඛාන් නිදහස් කරන ලෙස රජයට බල කරමින් ලක්ෂ සංඛ්‍යාත ජනතාව දසදෙසින් ඉස්ලාමාබාද් අගනුවරට ඇතුළු වෙමින් සිටින බව විදෙස් මාධ්‍ය වාර්තා කළේය.
ඉම්රාන්ගේ ටෙහ්රීකි ඉන්සාෆ් පක්ෂය විසින් සංවිධාන කළ එම විරෝධතා පා ගමන පාකිස්තානයේ නගර රැසක සිට අතිවිශාල ජන සහභාගිත්වයෙන් අගනුවර කරා ළඟාවී ඇති බවත්, රජයේ නියෝග මත ඉස්ලාමාබාද් අගනුවරට ඇතුළුවීම වැළැක්වීම සඳහා සියලු ප්‍රධාන මාර්ග කන්ටේනර් බහාලුම් යොදා අවහිර කළද ඒ සියලු මාර්ග බාධක නොතකමින් ජනතාව ඉදිරියට ඇදෙමින් සිටින බවත් විදෙස් මාධ්‍ය වැඩිදුරටත් වාර්තා කළේය.
මේ අතර පාකිස්තානයේ හිටපු අගමැති ඉම්රාන් ඛාන් නිදහස් කරන ලෙස ඉල්ලා විදෙස් රටවල් ගණනාවක 60කට අධික ස්ථානවල විරෝධතා රැලි ආරම්භ වී ඇතැයි විදෙස් මාධ්‍ය වාර්තා කළේය.
රටවල් රැසක පදිංචිව සිටින හා රැකියාවේ නිරතව සිටින දහස් සංඛ්‍යාත පාකිස්තාන ජනතාව වීදි බැස එම විරෝධතා සඳහා සහභාගි වෙමින් සිටින බවද විදෙස් මාධ්‍ය වැඩිදුරටත් වාර්තා කළේය.
අමෙරිකාවේ ෆ්ලොරිඩා ප්‍රාන්තය කේන්ද්‍ර කරමින් සහ චිකාගෝ ඇතුළු නගර රැසකත්,ටයිම්ස් චතුරස්‍රය ඉදිරිපිටත් විරෝධතා පැවැත්වෙන අතර, නවසීලන්තයේ ඕක්ලන්ඩ් නුවර, ප්‍රංශය, ලන්ඩනයේ අගමැති නිවෙස අසල, බෙල්ජියමේ බෘසල්ස් නුවර යුරෝපා පාර්ලිමේන්තුව ඉදිරිපිට, ජපානය, ස්වීඩනය, ග්‍රීසිය, සිඩ්නි, ජර්මනිය, මෙල්බර්න්, ස්පාඤ්ඤය, ඉතාලිය, නෝර්වේ ඇතුළු රටවල් රැසක විවිධ ස්ථානවල එම විරෝධතා රැලි පැවැත්වෙන බව විදෙස් මාධ්‍ය සඳහන් කළේය.
About The Author
