2024 බුකර් සාහිත්‍ය සම්මානය බ්‍රිතාන්‍ය ලේඛිකා සමන්තාට
2024 බුකර් සාහිත්‍ය සම්මානය බ්‍රිතාන්‍ය ලේඛිකා සමන්තාට
අඩසිය වසරක් පුරා පිරිනැමෙන ජාත්‍යන්තර බුකර් සම්මානය මේ වසරේදී බ්‍රිතාන්‍යයේ ප්‍රකට ලේඛිකා සමන්තා හාර්වේගේ ‘ඕබිටල්’ ප්‍රබන්ධ නවකතාවට හිමි වූ බව විදෙස් මාධ්‍ය වාර්තා කළේය.
වසර 5කට පසු මේ විශිෂ්ට සම්මානයෙන් පිදුම් ලැබූ පළමු ලේඛිකාව ලෙසද ඇය වාර්තා පොතට එක්වූ බව විදෙස් මාධ්‍ය සඳහන් කළේය. මීට පෙර අවසන් වරට 2019දී කැනේඩියානු ලේඛිකා මාගරට් අට්වුඩ්ගේ The Testaments සහ බ්‍රිතාන්‍ය ජාතික බර්නඩින් එවරිස්ටෝගේ Girl, Woman, Other කෘතිය අතර සමසේ බෙදී ගොස් තිබූ බවද වාර්තා වේ.
ජාත්‍යන්තර අභ්‍යවකාශ මධ්‍යස්ථානය වෙත යන අමෙරිකානු, රුසියානු, ඉතාලි, බ්‍රිතාන්‍ය හා ජපාන ගගනගාමීන් 6 දෙනකු විසින් පැය 24ක් ඇතුළත පැයට සැතපුම් 17,000ක වේගයෙන් පෘථිවිය වටා 16 වාරයක් ගමන් කරමින් ලැබූ අත්දැකීම් මේ විද්‍යා ප්‍රබන්ධයට ඇතුළත් වන අතර, එය බුකර් සම්මාන ඉතිහාසයේ අභ්‍යවකාශය ඇසුරින් රචිත කෘතියක් ඇගැයීමට ලක්වූ පළමු අවස්ථාව වන බවද වාර්තා වේ.
‘ඕබිටල්’ කෘතිය පිටු 136කින් සමන්විත බවත්, එවැනි කෙටි නවකතාවක් බුකර් සම්මානයට පාත්‍ර වූයේ වසර 45කට පසුව බවත් වැඩිදුරටත් වාර්තා වේ. මීට පෙර බ්‍රිතාන්‍ය ජාතික පෙනෙලොප් ෆිට්ස්ජෙරාල්ඩ් විසින් රචිත Offshore කෘතිය පිටු 132ක නවකතාව 1979 බුකර් සම්මානය හිමිකර ගනු ලැබීය.
බුකර් සාහිත්‍ය සම්මානය සමඟ සමන්තාට පවුම් පනස්දහසක මුදල් ත්‍යාගයක්ද හිමි වූ අතර, 49 හැවිරිදි මේ ලේඛිකාව සඳහන් කර ඇත්තේ මේ සම්මානය ඇගේ ජීවිතය වෙනස් කරනු ඇති බවය. ‘මට අලුත් බයිසිකලයක් ගන්න ඕන කරලයි තිබුණේ. දැන් ඒක කරගන්න පුළුවනි’ සම්මානය දිනා ගැනීමෙන් පසු ඇය එසේ සඳහන් කර තිබේ.
About The Author
