කොළඹ වෙරළ තීරයට කැස්බෑ මළසිරුරු ගොඩගසයි, හේතුව සොයන්න අධිකරණයෙන් නියෝග

වැල්ලවත්තේ සිට ගාලු මුවදොර දක්වා වෙරළ තීරයට පෙරේදා (21) සහ ඊයේ (22) දිනයේදීත් කැස්බෑ මළසිරුරු 10කට වැඩි ප්‍රමාණයක් අසාමාන්‍ය ලෙස ගොඩගසා තිබෙන බවට වාර්තා වනවා.

කැස්බෑ සංරක්ෂණ ප්‍රදේශයක් ලෙස නම් කර ඇති ගාලු මුවදොර මෙන්ම කැස්බෑවුන් නිතර ගැවසෙන වැල්ලවත්ත සහ දෙහිවල ඇතුළු වෙරළ තීරයට ඊයේ කැස්බෑ මළසිරුරු 02ක් සහ අද තවත් මළසිරුරු 07කට වැඩි ප්‍රමාණයක් ගොඩගසා තිබෙනවා.

අසාමාන්‍ය ලෙස ගොඩ ගසා තිබූ මෙම කැස්බෑ මළසිරුරු කිහිපයක ඇස් ඉදිමී ඇති අතර, ඇතැම් සිරුරුවලින් රුධිරය වහනය වන ආකාරයද දක්නට ලැ‍බෙන අතර මිය ගිය මසුන්ගේ සිරුරු කිහිපයක්ද වෙරළ තීරයට ගොඩගසා තිබෙනවා.

මේ සම්බන්ධයෙන් නාවික හමුදාව කළ දැනුම්දීම අනුව වන ජීවී සංරක්ෂණ දෙපාර්තමේන්තුව සහ නාරා ආයතනය අදත් එම ස්ථානයට පැමිණ පොලීසිය හා නාවික හමුදාව සමග එක්වී විමර්ශන ආරම්භ කර තිබුණා.

ඒ අනුව වන ජීවි සංරක්ෂණ දෙපාර්තමේන්තුව කොළඹ කොටුව මහෙස්ත්‍රාත් අධිකරණය වෙත මෝසමක් ගොනු කරමින්, ගාලු මුවදොර වෙරළ තීරයට ගොඩගසා තිබූ කැස්බෑ මළසිරුරු 04 ද අධිකරණය හමුවට ඉදිරිපත් කළා.

එහිදී කොළඹ කොටුව මහෙස්ත්‍රාත් තිලිණ ගමගේ මහතා බෙල්ලන්විල පශු වෛද්‍ය නිලධාරීවරයාට නියෝග කළේ, පශ්චාත් මරණ පරීක්ෂණ සිදුකර මෙම කැස්බෑවුන්ගේ මරණවලට හේතුව සම්බන්ධයෙන් වාර්තාවක් අධිකරණයට දන්වන ලෙසයි.

-news19