මෛත්‍රීගේ සමාව අයැදීම කතෝලික සභාව පිළිනොගනී
මෛත්‍රීගේ සමාව අයැදීම කතෝලික සභාව පිළිනොගනී
පාස්කු ඉරිදා ත්‍රස්ත ප්‍රහාරය සම්බන්ධයෙන් හිටපු ජනාධිපති මෛත්‍රීපාල සිරිසේන මහතා කළ සමාව අයැදීම කතෝලික සභාව පිළිනොගන්නා බව ජාතික කතෝලික ජනසන්නිවේදන අධ්‍යක්‍ෂ ජූඩ් ක්‍රිෂාන්ත ප්‍රනාන්දු පියතුමෝ පැවසූහ.
ඔහුට කතෝලික ජනතාවගෙන් සමාව ඉල්ලීමට සිහිපත්ව ඇත්තේ වසර 4කට පසු කරමුලටම හිරවූ අවස්ථාවේ බවත්, සමාව ඉල්ලීමට අවශ්‍ය නම් මෙය සිදුවූ මොහොතේ ජනාධිපතිධූරයෙන් ඉවත් වී කළ යුතුව තිබූ බවත් පියතුමෝ කීහ.
තොරතුරු ලැබී තිබියදීත් මෙම ප්‍රහාරය සිදුවන්නට සැලැස්වීම විශාල වරදක් බවත්, යුද්ධය කාලයේ සිදුවූ බෝම්බ ප්‍රහාරවලට එය සමාන කළ නොහැකි බවත් පියතුමෝ සඳහන් කළහ.
තොරතුරු ලැබුණු නිලධාරීන් තමාව දැනුවත් කර නොමැති බවත්, තමා පත්කළ නිලධාරීන් වගකීම් පැහැරහැරීම නිසා තමන්ට වන්දි ගෙවන්නට සිදුවූ බවත් මෛත්‍රීපාල සිරිසේන මහතා පවසන්නේ නඩු තීන්දුව හරි ආකාරයෙන් කියවා නොමැතිව විය යුතු බව ද ජූඩ් ක්‍රිෂාන්ත පියතුමෝ කීහ.
සහරාන් සම්බන්ධයෙන් සිදුවීම් වාර්තා වෙද්දීත් ජනාධිපතිවරයා ඒ ගැන නොසලකා කටයුතු කිරීමත්, පහළ නිලධාරීන්ගෙන් තොරතුරු ලබාගැනීමට ක්‍රමවේදයක් සකසා නොතිබීමත් නිසා මෙන්ම ආරක්‍ෂක අමාත්‍යවරයා ලෙස වගකීම් පැහැර හැරීම, විදෙස්ගත වන විට වැඩබලන ඇමතිවරයෙක් පත්කර නොයාම ආදී වැරදි ගණනාවක් සම්බන්ධයෙන් ඔහුට චෝදනා එල්ල වී ඇතැයි ද පියතුමෝ සඳහන් කළේය.
කතෝලික සභාව එම නඩු තීන්දුව හොඳින් අවබෝධ කරගෙන ඇති බවත්, දෙවියන්වහන්සේ වෙනුවෙන් සමාව ඉල්ලීමට එතුමා දෙවියන් වහන්සේගේ නියෝජිතයකු නොවන බවත් පියතුමෝ පැවසූහ.
සියලුම ජනතාවගේ ආරක්‍ෂාව තැකීමට ලක්නොකිරීම නිසා එතුමා රටේම ජනතාවගෙන් සමාව ඉල්ලිය යුතු යැයි ද පියතුමෝ කීහ.
About The Author
