බ්‍රිතාන්‍යයේ හැරී කුමරුගේ “Spare” ග්‍රන්ථය නව ලෝක වාර්තාවක් පිහිටුවයි

ලෝකෙම විශේෂ කතාබහකට ලක්ව ඇති බ්‍රිතාන්‍යයේ හැරී කුමරු විසින් රචිත “Spare” ග්‍රන්ථය නව ලෝක වාර්තාවක් පිහිටුවීමට සමත්ව ඇති බව විදෙස් මාධ්‍ය වාර්තා කර තිබේ.

විදෙස් මාධ්‍ය වැඩිදුරටත් වාර්තා කර ඇත්තේ ප්‍රබන්ධ නොවන ග්‍රන්ථ අතරින් ලොව වේගයෙන්ම අලෙවි වූ ග්‍රන්ථය බවට එය පත්ව ඇති බවය.

එම වාර්තාවල සඳහන් වන්නේ බ්‍රිතාන්‍යය, අමෙරිකාව සහ කැනඩාව රටවල “Spare” ග්‍රන්ථය අලෙවිය ආරම්භ කළ පළමු දින තුළ පමණක් මිලියන 1.43ක පිටපත් ප්‍රමාණයක් අලෙවි වී ඇති බවය. මීට පෙර එම වාර්තාව හිමිව තිබුණේ අමෙරිකාවේ හිටපු ජනාධිපති ඔබාමා විසින් 2020 වර්ෂයේදී ප්‍රකාශයට පත්කළ A Promised Land කෘතියටයි. එය ප්‍රකාශයට පත්කළ දිනයේදී 887,000ක පිටපත් ප්‍රමාණයක් අලෙවී වී තිබූ බව විදෙස් මාධ්‍ය වාර්තා කර සිටී.

විදෙස් මාධ්‍ය වැඩිදුරටත් වාර්තා කර ඇත්තේ මෙම ග්‍රන්ථය භාෂා 15කින් ප්‍රකාශයට පත්කර ඇති බවය.

මේ අතර මම ග්‍රන්ථය තුළ ආන්දෝලනාත්මක සිද්ධි රැසක් ඇතුළත්ව තිබීමත් සමඟ ජාත්‍යන්තරයේ සුවිශේෂී අවධානයක් දිනා ගැනීමට සමත්ව තිබේ.

කෙසේ වෙතත් හැරී කුමරු පසුව ප්‍රකාශ කර තිබුණේ මෙම ග්‍රන්ථය හේතුවෙන් තමන්ටත් තම පවුලේ අයටත් ජීවිත තර්ජන එල්ලවී ඇති බවය. ඒ අනුව විදෙස් මාධ්‍ය වාර්තා කර ඇත්තේ මේ වනවිටත් බ්‍රිතාන්‍ය රජ පවුලේ ආරක්ෂාව මේ වනවිට තර කර ඇති බවය.