අඛණ්ඩ ලෙස වැඩි වෙමින් පවතින ක්ෂය රෝගීන් සංඛ්‍යාව
රටේ ක්ෂය රෝගීන්ගේ සංඛ්‍යාව අඛණ්ඩව ඉහළ යන බව වාර්තා වේ.
ක්ෂය රෝගීන් 40%ක් බස්නාහිර පළාත තුළ සිටින බව ක්ෂය රෝග හා ශ්වසන රෝග පිළිබඳ ජාතික සංවිධානය පවසා ඇත.
ශ්‍රී ලංකාවේ සෑම වසරකම ක්ෂය රෝගීන් 8000ත් 9000ත් අතර සංඛ්‍යාවක් වාර්තා වන බව ක්ෂය රෝග හා ශ්වසන රෝග පිළිබඳ ජාතික සංවිධානයේ නියෝජ්‍ය අධ්‍යක්ෂ, වෛද්‍ය නිරූපා පල්ලෙවත්ත මහත්මිය ප්‍රකාශ කර ඇත.
වයස අවුරුදු 55 ට වැඩි පුද්ගලයින් මෙම රෝගයෙන් බලපෑමට ලක්ව ඇති බවත්, හඳුනා නොගත් පුද්ගලයින් 5000ක් පමණ රෝග වාහකයන් ලෙස අප අතර සිටින බවද ඇය පැවසුවාය.
මෙය ඉතා භයානක බව පැවසූ වෛද්‍යවරිය, සමහර රෝගීන් නිසි ලෙස ප්‍රතිකාර ලබා නොගෙන අනෙක් අයට ද එය ව්‍යාප්ත කරන බව සඳහන් කළාය.
වසරකට 500 දෙනෙකු පමණ ක්ෂය රෝගයෙන් මිය යන බව ද වෛද්‍යවරිය පැවසීය.
නිසි ප්‍රතිකාර ලබා ගැනීමෙන්, මෙම රෝගය මුළුමනින්ම පාලනය කළ හැකි බවත්, නාගරික ප්‍රදේශවල වාසය කරන්නන්ගෙන් අධික වශයෙන් මෙම රෝගය ව්‍යාප්ත වන බවත් ඇය පැවසුවාය.
අදාළ රෝගීන්ගෙන් 23%ක් කොළඹ දිස්ත්‍රික්කයේ සිටින අතර, 40%ක් මුළු බස්නාහිර පළාත තුළම සිටින බව ක්ෂය රෝග හා ශ්වසන රෝග පිළිබඳ ජාතික සංවිධානයේ නියෝජ්‍ය අධ්‍යක්ෂ, වෛද්‍ය නිරූපා පල්ලෙවත්ත මහත්මිය වැඩි දුරටත් පැහැදිලි කර දී තිබේ.
About The Author
