ලොව විශාලතම ඇලුමිනියම් කර්මාන්තශාලාවකට ඉරාන ප්‍රහාරයක්

බහරේනයේ පිහිටි ලොව විශාලතම ඇලුමිනියම් පිරිපහදු මධ්‍යස්ථානයක් වන ‘ඇලුමිනියම් බහරේන්’ (Alba) ආයතනය වෙත ඉරානය විසින් එල්ල කළ ප්‍රහාරයකින් එහි සේවකයන් දෙදෙනෙකු සුළු තුවාල ලබා ඇති බව එම සමාගම තහවුරු කරයි.

සෙනසුරාදා දින එල්ල වූ මෙම ප්‍රහාරයෙන් කර්මාන්තශාලාවට සිදුව ඇති හානිය පිළිබඳව මේ වන විටත් තක්සේරු කරමින් පවතින බව බහරේන් පුවත් ඒජන්සිය වාර්තා කළේය. තම සේවකයන්ගේ ආරක්ෂාව සහ සුරක්ෂිතභාවය වෙනුවෙන් උපරිම ප්‍රමුඛතාවය ලබා දෙන බව අදාළ සමාගම සිය ප්‍රකාශය මඟින් අවධාරණය කර ඇත. ඉරාන වානේ කර්මාන්තශාලා දෙකකට එල්ල වූ ප්‍රහාරයන්ට ප්‍රතිචාර වශයෙන් බහරේනයේ ‘Alba’ සහ එක්සත් අරාබි එමීර් රාජ්‍යයේ ‘Emirates Global Aluminium’ යන ආයතන ඉලක්ක කර ගත් බව ඉරාන විප්ලවීය ආරක්ෂක බලකාය (Revolutionary Guards) පවසා තිබේ.

පවතින යුදමය වාතාවරණය සහ හෝමුස් සමුද්‍ර සන්ධිය වසා දැමීම හේතුවෙන් ඇති වූ බාධා කිරීම් හමුවේ තම නිෂ්පාදන ධාරිතාවෙන් 19%ක් නියෝජනය කරන නිෂ්පාදන මාර්ග තුනක් තාවකාලිකව නතර කිරීමටද මෙම මස මුලදී Alba සමාගම පියවර ගෙන තිබුණි. මේ අතර එක්සත් අරාබි එමීර් රාජ්‍යයේ ඇලුමිනියම් සමාගමද තහවුරු කළේ සෙනසුරාදා එල්ල වූ ප්‍රහාරයෙන් තම ආයතනයට සැලකිය යුතු හානියක් සිදුව ඇති බවත්, සේවකයන් පිරිසක් තුවාල ලබා ඇති නමුත් ඔවුන්ගේ ජීවිතවලට තර්ජනයක් නොමැති බවත්ය.

මැදපෙරදිග කලාපයේ කාර්මික මධ්‍යස්ථාන ඉලක්ක කර ගනිමින් එල්ල වන මෙම ප්‍රහාර හේතුවෙන් ගෝලීය ඇලුමිනියම් මිල ඉහළ යාමට සහ සැපයුම් දාමයට දැඩි බලපෑම් එල්ල වනු ඇතැයි ආර්ථික විශේෂඥයෝ අනතුරු අඟවති.