අයථා ලෙස වත්කම් හා දේපළ උපයා ගැනීම සම්බන්ධයෙන් අනූෂ පැල්පිට තවදුරටත් රිමාන්ඩ්

අයථා ලෙස වත්කම් හා දේපළ උපයා ගැනීම සම්බන්ධයෙන් සැකපිට අත්අඩංගුවට ගෙන රිමාන්ඩ් භාරයේ පසුවන හිටපු අමාත්‍යාංශ ලේකම්වරයෙකු වන අනූෂ පැල්පිටව එළැඹෙන පෙබරවාරි 20 වනදා දක්වා තවදුරටත් රිමාන්ඩ් භාරයේ තැබීමට කොළඹ මහෙස්ත්‍රාත් අධිකරණය ඊයේ (06) නියෝග කර තිබේ.

අල්ලස් හෝ දූෂණ චෝදනා විමර්ශන කොමිෂන් සභාව විසින් ඉදිරිපත් කළ කරුණු සහ විත්ති පාර්ශවයේ නීතිඥවරුන්ගේ කරුණු දැක්වීම් සලකා බැලූ මහෙස්ත්‍රාත්වරයා මෙම නියෝගය නිකුත් කර තිබෙනවා.

රජයේ උසස් නිලධාරියෙකු ලෙස සේවය කළ කාලසීමාව තුළ සිය නීත්‍යානුකූල ආදායමට වඩා වැඩි වත්කම් ප්‍රමාණයක් උපයා ගැනීම සහ ඒවායේ මූලාශ්‍ර හෙළි කිරීමට අපොහොසත් වීම සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් සිදු කරන ලද දීර්ඝ විමර්ශනයකින් අනතුරුව, ඔහු සතුව පවතින බව කියන නිවාස, ඉඩකඩම් සහ බැංකු ගිණුම් සම්බන්ධයෙන් කරුණු අනාවරණය කරගෙන ඇත.

අදාළ වත්කම් උපයා ගත් ආකාරය සම්බන්ධයෙන් සාධාරණ හේතු දැක්වීමට අපොහොසත් වීම මත, අල්ලස් කොමිසම විසින් පසුගියදා ඔහුව අත්අඩංගුවට ගෙන අධිකරණයට ඉදිරිපත් කරන ලදී.

අද දින නඩු විභාගයේදී අල්ලස් කොමිසම අධිකරණයට දන්වා සිටියේ විමර්ශන තවමත් අවසන් වී නොමැති බවත්, සැකකරු ඇප මත මුදා හැරීම විමර්ශනවලට බාධාවක් විය හැකි බවත්ය. සැකකරුගේ පාර්ශවයෙන් ඇප ඉල්ලීම් කළද, කරුණු සලකා බැලූ මහෙස්ත්‍රාත්වරයා රිමාන්ඩ් කාලය දීර්ඝ කිරීමට තීරණය කළේය.

මීට පෙරද අනූෂ පැල්පිට සම්බන්ධයෙන් දැඩි කතාබහට ලක්වූ නඩුවක් වූයේ සිල් රෙදි නඩුවයි. 2015 ජනාධිපතිවරණ සමයේ රජයේ මුදල් රුපියල් මිලියන 600ක් වැය කර සිල් රෙදි බෙදාදීමේ සිද්ධියට අදාළව ලලිත් වීරතුංග සහ අනූෂ පැල්පිට හට කොළඹ මහාධිකරණය විසින් සිරදඬුවම් නියම කරන ලදී. කෙසේ වෙතත්, පසුව ඉදිරිපත් කළ අභියාචනයක් සලකා බැලූ අභියාචනාධිකරණය ඔවුන්ව එම චෝදනාවලින් නිදහස් කිරීමට නියෝග කළේය.