අ.ඩො බිලි­ය­න­යක විය­ද­මින් ලොව විශා­ල­තම පුරා­විද්‍යා කෞතු­කා­ගා­රය ඊජි­ප්තු­වේදී විවෘත වේ…

තනි ශිෂ්ටාචාරයක් සඳහා වෙන් වූ ලොව විශාලතම පුරාවිද්‍යා කෞතුකාගාරය ලෙස සැලකෙන ඊජිප්තුවේ කයිරෝ නුවරට යාබදව පිහිටි ‘ග්‍රෑන්ඩ් ඊජිප්ෂන්’ කෞතුකාගාරය මහජනතාවට සම්පූර්ණයෙන්ම විවෘත කර ඇතැයි විදෙස් මාධ්‍ය වාර්තා කරයි.

අමෙරිකානු ඩොලර් බිලියනයක වියදමින් දශක දෙකක දීර්ඝ කාලපරිච්ඡේදයක් පුරා ඉදිකිරීම් කටයුතු සිදු කළ මේ මහා කෞතුකාගාරය මිනිසා විසින් තනනු ලැබූ ලොව විශාලතම ගිසාහි පිරමීඩයට සැතපුමක් පමණ දුරින් පිහිටා ඇති අතර, එහි වපසරිය වර්ග කිලෝමීටර් 4,70,000ක් බව විදෙස් මාධ්‍ය වැඩිදුරටත් වාර්තා කරයි. ඊජිප්තුවේ ජනාධිපති අබ්දෙල් ෆටා අල් සිසීගේ ප්‍රධානත්වයෙන් පැවති විවෘත කිරීමේ උත්සවයට මැදපෙරදිග රටවල රාජ්‍ය නායකයන්, රජවරුන් ඇතුළු දෙස් විදෙස් අමුත්තන් විශාල පිරිසක් සහභාගි වූ බවද වාර්තා වේ.

1992 දී නිවේදනය කරනු ලැබූ ග්‍රෑන්ඩ් ඊජිප්ෂන් කෞතුකාගාරයේ ඉදිකිරීම් කටයුතු ආරම්භ කර ඇත්තේ 2005 වසරේදී බවත්, එහි ඇතැම් ගොඩනැඟිලි සංකීර්ණ පමණක් පසුගිය වසරේදී විවෘත කරනු ලැබූ බවත් විදෙස් මාධ්‍ය සඳහන් කරයි. එරට පෞරාණික ශිෂ්ටාචාරය විදහා දක්වමින් වසර 3,200ක් පැරැණි දෙවැනි රාම්සෙස් පාරාවෝ රජුගේ ටොන් 83ක් බරැති යෝධ ප්‍රතිමාවක් ද, වසර 4,500ක් පැරැණි කුෆු රජ වංශයට අයත් බෝට්ටුවක්ද ඇතුළත් ග්‍රෑන්ඩ් ඊජිප්ෂන් කෞතුකාගාරයේ විවිධ පෞරාණික භාණ්ඩ පනස්දහසක් පමණ තැන්පත් කර ඇතැයි වාර්තා වේ.