හිටපු පාර්ලිමේන්තු මන්ත්‍රී පූජ්‍ය අතුරලියේ රතන හිමියන්, ලබන 12 වැනිදා දක්වා රක්ෂිත බන්ධනාගාරගත කිරීමට නුගේගොඩ මහේස්ත්‍රාත් අධිකරණය නියෝග කළේය.
ඒ, කොළඹ අපරාධ කොට්ඨාසයේ පවරා ඇති නඩුවක් ඊයේ (29) විභාගයට ගත් අවස්ථාවේදීයී.
2020 වසරේ මහ මැතිවරණයෙන් අපේ ජන බල පක්ෂයට ජාතික ලැයිස්තු මන්ත්‍රී ධුරයක් හිමිවිය. බලපෑම් එල්ල කර එම මන්ත්‍රී ධුරය ලබාගැනීම සදහා අපේ ජන බල පක්ෂයේ මහ ලේකම් පූජ්‍ය වේදිනිගම විමලතිස්ස හිමියන් පැහැරගෙන ගොස් රඳවා තබා ගැනීම සම්බන්ධයෙන් පූජ්‍ය අතුරලියේ රතන හිමියන්ට චෝදනා එල්ල වී තිබේ.
හිටපු අමාත්‍ය රාජිත සේනාරත්න මහතා, රක්ෂිත බන්ධනාගාර ගත කිරීමට කොළඹ මහාධිකරණය නියෝග කළේය.
ඒ, අල්ලස් හෝ දූෂණ චෝදනා විමර්ශන කොමිෂන් සභාව පවරා ඇති නඩුවක්, ඊයේ(29) කැඳවූ අවස්ථාවේදීයී.
අදාළ අවස්ථාවේ අධිකරණයයේ අවධානයට ලක්වූයේ රාජිත සේනාරත්න මහතාට මේ වන විට කොළඹ මහේස්ත්‍රාත් අධිකරණයේ වරෙන්තුවක් නිකුත් කර ඇති බවයි. අදාළ කරුණු සැළකිල්ලට ගත් මහාධිකරණය, තම අධිකරණය හමුවේ ඇති නඩුවට ඉදිරි දිනයක් නියම කළේය.
මහාධිකරණය නියෝග කළේ, රාජිත සේනාරත්න මහතා, බන්ධනාගාර නිලධාරීන් භාරයට ගෙන කොළඹ මහේස්ත්‍රාත් අධිකරණය හමුවට ඉදිරිපත් කරන ලෙසයි.
හිටපු රාජ්‍ය අමාත්‍ය නිමල් ලන්සා මහතා සැප්තැම්බර් 12 දක්වා රක්ෂිත බන්ධනාගාරගත කෙරිණ.
ඒ, ඔහු ඊයේ (29) පස්වරුවේ මීගමුව මහේස්ත්‍රාත් රඛිත අබේසිංහ මහතා හමුවට ඉදිරිපත් කිරීමෙන් අනතුරුවයි.
2006 වසරේ පළාත් පාලන ඡන්දය පැවති කාලසීමාවේදී නාගරික මන්ත්‍රීවරයෙකුගේ නිවසකට පහරදී අනර්ථයක් සිදු කිරීම සම්බන්ධයෙන් ඔහුට චෝදනා එල්ල වෙයි. ඒ අනුව අයුතුලෙස ඇතුල්වීම, අයුතු ජනරාශිය සහ සොරකම සම්බන්ධයෙන් ඔහුට චෝදනා එල්ල වෙයි.
හිටපු රාජ්‍ය අමාත්‍ය නිමල් ලන්සා මහතා (29) පෙරවරුවේ කොච්චිකඩේ පොලීසියට භාර වීමෙන් අනතුරුව ඔහු අත්අඩංගුවට ගනු ලැබුවේය.
මේ අතර දූෂණය නමැති චෝදනාවක් සම්බන්ධයෙන් රක්ෂිත බන්ධනාගාරගත කර සිටි හිටපු රාජ්‍ය අමාත්‍ය ශෂීන්ද්‍ර රාජපක්ෂ මහතාගේ ඇප ඉල්ලීම ප්‍රතික්ෂේප කිරීමට කොළඹ මහේස්ත්‍රාත් අධිකරණය නියම කෙරුණි.
ඒ අනුව සැකකරු ලබන 12 වනදා දක්වා යළිත් රක්ෂිත බන්ධනාගාරගත කරන බව කොළඹ ප්‍රධාන මහේස්ත්‍රාත් අසංක එස්. බෝදරගම මහතා ඊයේ (29) නියෝග කළේය.