ජුනි මාසය වන විට විදේශ ආයෝ­ජන කෝටි 116,970ක් දක්වා ඉහළට

ස්ථාවර සහ ආයෝජක හිතකාමී ආර්ථික පරිසරයක් ඇති කිරීම තුළ පෙර වසරට සාපේක්ෂව විදේශ ඍජු ආයෝජන (FDI) රටට ගලා ඒමේ දැවැන්ත වර්ධනයක් අත්කර ගනිමින් මේ වසරේ ජූනි මාසය වන විට රුපියල් කෝටි 116,970ක (අමෙරිකානු ඩොලර් මිලියන 3,899) විදේශ ආයෝජන මෙරටට ලැබී තිබෙන බව ශ්‍රී ලංකා ආයෝජන මණ්ඩලය (BOI) ප්‍රකාශ කරනවා.

මෙරට ආයෝජන වෙත පහසුකම් සැලසීමට සාර්ව ආර්ථික ස්ථායීතාව සහ ස්ථාවර ප්‍රතිපත්ති රාමු ස්ථාපිත කිරීම සඳහා රජය දක්වන නොසැලෙන කැපවීම මත ජාත්‍යන්තර ආයෝජකයන්ගේ විශ්වාසය නැවත ස්ථාපනය වීම නව ආයෝජන යෝජනා ලැබීමට හේතු වී ඇති බවයි ආයෝජන මණ්ඩලය පෙන්වා දෙන්නේ.

2025 ජූනි මාසය වන විට නව ව්‍යාපෘති යෝජනා 40ක් සහ දැනට පවතින ව්‍යාපාර පුළුල් කිරීමට යෝජනා 39ක් ඇතුළුව ආයෝජන යෝජනා 79ක් ශ්‍රී ලංකා ආයෝජන මණ්ඩලයට ලැබී ඇති බව මේ ආයෝජනවල මුළු ඇස්තමේන්තුගත වටිනාකම අමෙරිකානු ඩොලර් මිලියන 4,669ක් බවද පෙන්වා දෙනවා.

එම ආයෝජන අතරින් අමෙරිකානු ඩොලර් මිලියන 3,899ක් විදේශ ආයෝජන ලෙස සඳහන්.

ඉතිරි අමෙරිකානු ඩොලර් මිලියන 770 දේශීය ආයෝජන බවද, මෙය පසුගිය 2024 වසරේ එම කාලපරිච්ඡේදයේ ලැබුණු ආයෝජන යෝජනාවලට සාපේක්ෂව සියයට 18ක වැඩිවීමක් බවද කියා සිටිනවා.

මේ ආයෝජන යෝජනා පුළුල් පරාසයක විහිදෙන අංශවලින් සහ ලොව පුරා විවිධ රටවලින් ලැබුණු යෝජනායි. මේවා අපනයනය සඳහා වන ටයර් සහ ධාවන පථ, ඛනිජ සැකසුම් සහ ඇඟලුම් ආශ්‍රිත භාණ්ඩ ඇතුළු නිෂ්පාදන අංශයේ ව්‍යාපෘති සඳහා මෙන්ම බලශක්ති, සහාධිපත්‍යය මහල් නිවාස සහ මිශ්‍ර භාවිත සංවර්ධන ව්‍යාපෘති ඇතුළු දේපොළ වෙළෙඳාම් ව්‍යාපෘති, හෝටල් ව්‍යාපෘති, කිරි ගව පාලනය, මුහුදු පැළෑටි සහ භෝග වගාව ඇතුළු කෘෂිකාර්මික ආශ්‍රිත ව්‍යාපෘති සඳහාද වන අංශවලින් සමන්විත වෙයි. මේවා කැනඩාව, චීනය, ඉන්දියාව, සිංගප්පූරුව, ස්විට්සර්ලන්තය, චෙක් ජනරජය, ඔස්ට්‍රේලියාව, සෞදි අරාබිය, නෙදර්ලන්තය, දකුණු කොරියාව සහ තවත් රටවල් කිහිපයකින් ලැබුණු යෝජනා බවද ශ්‍රී ලංකා ආයෝජන මණ්ඩලය පවසනවා.

ආයෝජන මණ්ඩලයට ලැබෙන සියලුම ආයෝජන යෝජනා, පුළුල් ඇගයීම් ක්‍රියාවලියකට යටත් වන අතර, අදාළ රේඛීය ආයතනවලින් නිෂ්කාශනය ලැබීමෙන් පසු ආයෝජන අනුමැතිය ලබා දෙනවා.

ඒ අනුව 2025 ජනවාරි සිට ජූනි දක්වා කාලයේ ආයෝජන මණ්ඩලය විසින් අලුත් ව්‍යාපෘති 28ක් සහ පුළුල් කිරීමේ ව්‍යාපෘති 20කින් සමන්විත ව්‍යාපෘති 48ක් අනුමත කර තිබෙන බවයි සඳහන් වන්නේ.

ඒවායේ සමස්ත ආයෝජන වටිනාකම අමෙරිකානු ඩොලර් මිලියන 499ක් වන අතර, මෙය පෙර වසරේ අනුරූප කාලපරිච්ඡේදයට සාපේක්ෂව සියයට 28ක වර්ධනයක් පෙන්නුම් කරනවා.

මේ අනුමත ආයෝජන වාණිජකරණයෙන් පසු රැකියා අවස්ථා 10,000ක් පමණ උත්පාදනය කිරීමටයි අපේක්ෂා කරන්නේ.

ආයෝජන යෝජනා ලැබීමෙන් අනතුරුව ඒවා හරහා රටට ලැබුණු ඍජු විදේශ ආයෝජන (FDI) සහ දේශීය ආයෝජන අගයන් පිළිබඳ දත්ත රැස් කිරීම ද ආයෝජන මණ්ඩලය විසින් සිදු කරනවා.

ඒ අනුව 2025 පළමු කාර්තුවේදී රටට ලබුණු ඍජු විදේශ ආයෝජන ප්‍රමාණය අමෙරිකානු ඩොලර් මිලියන 203ක් වූ අතර, එය 2024 පළමු කාර්තුවේ දී වාර්තා වූ අමෙරිකානු ඩොලර් මිලියන 107ට සාපේක්ෂව සියයට 90ක සැලකිය යුතු වර්ධනයක් සනිටුහන් කර තිබෙන බවයි සඳහන් වන්නේ.

මේ කාලසීමාවේ ගත් මුළු ඍජු විදේශ ආයෝජන ප්‍රමාණයෙන් සියයට 41ක් වරාය සංවර්ධන අංශයටද, සියයට 34ක් නිෂ්පාදන අංශයටද, සියයට 20ක් තොරතුරු හා සන්නිවේදන තාක්ෂණය (ICT), කෘෂිකර්මය, දේපොළ සංවර්ධනය සහ විදුලි සංදේශ වැනි අංශවලටද ලැබී ඇති බව සඳහන්.

ආයෝජකයන් තුළ විශ්වාසය නැවත ඇති කිරීමෙන් ශ්‍රී ලංකාව තුළ ආයෝජනය කිරීමට ආයෝජකයන්ගේ උනන්දුව සැලකිය යුතු ලෙස ඉහළ නැංවී තිබෙනවා.