මෙම වසරේ සැප්තැම්බර් මාසයේ ගතවු දින 10ක කාලය තුළ පමණක් ඩෙංගු රෝගීන් 900කට අධික සංඛ්‍යාවක් වාර්තා වී ඇතැයි ජාතික ඩෙංගු මර්දන ඒකකය සදහන් කරයි.
රජයේ ප්‍රවෘත්ති දෙපාර්තමේන්තුවට අනුව සැප්තැම්බර් මාසයේ දී (11) වන විට ඩෙංගු රෝගීන් 960ක් වාර්තා වී ඇති අතර, වසරේ මේ දක්වා රෝගීන් 62,838ක් වාර්තා වී ඇත.
ජාතික ඩෙංගු මර්දන ඒකකයේ අධ්යක්ෂ වෛද්‍ය නලින් ආරියරත්න මහතා පැවසුවේ ඩෙංගු රෝගීන්ගේ සැලකිය යුතු අඩුවීමක් දක්නට ලැබුණද පවතින වැසි සහිත තත්ත්වයත් සමඟ මදුරු ගහණයේ වැඩිවීමක් අපේක්ෂා කළ හැකි බවයි.
10,000ට ආසන්න වැඩිම රෝගීන් සංඛ්‍යාව මැයි මාසයේදී වාර්තා වී ඇති අතර පසුගිය මාසයේදී රෝගීන් 5,189ක් වාර්තා වී තිබේ.
කොළඹ පැවති මාධ්‍ය හමුවකට එක්වෙමින් ජාතික ඩෙංගු මර්දන ඒකකයේ අධ්යක්ෂ විශේෂඥ වෛද්‍ය නලින් ආරියරත්න මහතා තව දුරටත් සිටියේ වැඩි වශයෙන් රෝගීන් වාර්තා වන්නේ බස්නාහිර පළාතෙන් බවයි.
“පසුගිය මාසයේ අපට රෝගීන් 5000 ක් පමණ සිටි අතර මේ මාසයේ දින 10 තුළ රෝගීන් 900 කට ආසන්න සංඛ්‍යාවක් වාර්තා විය. සමස්ත රෝගීන් සංඛ්‍යාවෙන් 50%කට ආසන්න ප්‍රමාණයක් නිරීක්ෂණය වන්නේ විශේෂයෙන් බස්නාහිර පළාතෙනි. කෙසේ වෙතත්, ඒ අනුව රෝගීන්ගේ සැලකිය යුතු අඩුවීමක් අපි නිරීක්ෂණය කලේ පසුගිය කාල සීමාව හා සසඳන විට පසුගිය මාසයේ සහ මෙම මාසයේ රෝගින්ගේ ගනන අනුවයි.”
ඒ අනුව “දිනපතා රෝගීන් 100ත් 125ත් අතර සංඛ්‍යාවක් වාර්තා වන තත්වයක් දක්වා ඉහළ මට්ටමේ සිට පහත් මට්ටමට ද පැමිණ ඇත.”
කෙසේ වෙතත්, දිවයිනේ ඇතැම් ප්‍රදේශවලට පවතින වර්ෂාවත් සමඟ මදුරු ගහනයද ඉහළ යා හැකි බැවින් ඉදිරියේදී ඩෙංගු රෝගීන් වැඩි වීමේ අවදානමක් පවතින බවද විශේෂඥ වෛද්‍ය නලින් ආරියරත්න මහතා අනතුරු අඟවයි.