ලෝක ප්‍රකට ව්‍යාධි විද්‍යාඥයෙකු හා වෛරස් විද්‍යාඥයෙකු වන මහාචාර්ය මලික් පීරිස් පවසන්නේ COVID-19 ආසාදිතයින්ගේ සිරුරු භූමදාන කිරීම කොරෝනා වෛරසය පැතිරීමට හේතු විය හැකි බවට කරන ප්‍රකාශය අවිද්‍යාත්මක බවයි.
ඔහු දැනට හොංකොං විශ්ව විද්‍යාලයේ වෛරස් විද්‍යා අධ්‍යයන අංශයේ ප්‍රධාන මහාචාර්යවරයා වේ. ඔහු SARS වලට හේතු වන වෛරසය සොයාගත් ප්‍රමුඛ විද්‍යාඥයින්ගෙන් කෙනෙකි.
ඉංග්‍රීසි පුවත් පතකට මේ ගැන අදහස් දක්වමින් ආචාර්ය පීරිස් පැවසුවේ “පිළිතුර සරලයි. සමහර බැක්ටීරියා මෙන් නොව වෛරස් වලට ගුණනය විය හැක්කේ ජීව සෛල තුළ පමණි. මූලික වශයෙන් වෛරස් වලට ගුණනය වීම සඳහා ජීව සෛල අවශ්‍ය වේ. පුද්ගලයෙකු මිය ගිය විට සහ ඔහුගේ ශරීරයේ සෛල මිය ගිය විට වෛරසය මිය යයි. මෙය මුල් හේතුවයි.
“දෙවන හේතුව ආසාදන කාලයයි. වෛරසය වඩාත් බහුලව දක්නට ලැබෙන්නේ රෝග ලක්ෂණ ආරම්භ වීමට පෙර සහ රෝග ලක්ෂණ ආරම්භ වී දින 4-5 කට පසුවයි. රෝග ලක්ෂණ මතු වූ වහාම පුද්ගලයෙකු මිය යාම සිදුවන්නේ ඉතාම කලාතුරකිනි.
රෝග ලක්ෂණ මතු වී සති එකක් හෝ දෙකකට පසු ඔහු මිය යා හැකිය. මෙම කාලය තුළ ආසාදනය වීමේ සම්භාවිතාව ඉතා අඩුය. ප්‍රතිදේහ නිපදවීමත් සමඟ මෙය ඊටත් වඩා අඩුය.
“ඔබ මළ සිරුරු ජලයෙහි වළලන්න යන්නේ නැහැ. සිරුර අඩි හයක් පහළින් වළලනු ලැබූ විට එය ඉතා ආරක්ෂිත වේ. කිසියම් දුර්ලභ අවස්ථාවක, වෛරසයක් අවශේෂයේ ආසාදන වී තිබේ නම්, අඩි කිහිපයක් පස හරහා පෙරීම සිදුවී ජලයට මිශ්‍ර වීමේදී එය නොනැසී පැවතීම ඉතාමත් විරලයි.
“එබැවින්, කොරෝනා වෛරසය භූමදාන කිරීම මගින් එය පැතිර යෑම අතිශයින්ම විරලයි. මෙම භූමිදානය කිරීමේ ක්‍රියාවලිය (Burial process) පිළිබඳව මට හොඳ අවබෝධයක් තියෙනවා,” යනුවෙන් එම පුවත් පතට ඔහු පවසා තිබේ.
මහාචාර්ය මලික් පීරිස් වැනි ලෝක මට්ටමේ වෛරස් විද්‍යාඥයින්ගේ උපදෙස් ලබා නොගෙන ඔහු වැනි අය විශේෂඥ මණ්ඩලයට ඇතුළත් නොකරන ශ්‍රී ලාංකික විද්‍යාඥයන් කවුරුන්දැයි රවුෆ් හකීම් පසුගියදා පාර්ලිමේන්තුවේදී ප්‍රශ්න කර තිබීම මෙහිදී සඳහන් කළ යුතුයි.
– 15-12-2020 | The Island