කටාර් එමීර් රාජ්‍යයේ ‘Emiri Diwan’ හි ප්‍රකාශයකට අනුව, ප්‍රාදේශීය වර්ධනයන් සහ උග්‍රවීම් අවම කිරීමේ ප්‍රයත්නයන් පිළිබඳව සාකච්ඡා කිරීම සඳහා එක්සත් ජනපද ජනාධිපති ඩොනල්ඩ් ට්‍රම්ප් සහ කටාර්හි එමීර් ෂෙයික් තමීම් බින් හමාද් අල් තානි (Sheikh Tamim bin Hamad Al Thani) අතර දුරකථන සංවාදයක් පවත්වා ඇත.
”අර්බුදයට තිත තබන පුළුල් එකඟතාවයකට” පැමිණීම සඳහා සහ සාකච්ඡාවලට සහය දැක්වීම වෙනුවෙන් දෝහා (Doha) නුවර සිදුකරන මැදිහත්වීම් ඇතුළු ජාත්‍යන්තර රාජ්‍යතාන්ත්‍රික ප්‍රයත්නයන් දෙරටේ නායකයින්ගේ සමාලෝචනයට ලක්වූ බව එම ප්‍රකාශයේ දැක්වේ.
කලාපය තුළ තවදුරටත් ගැටුම් උග්‍රවීම වැළැක්වීම සඳහාත්, නාවික ගමනාගමනයේ නිදහස සහ බලශක්ති සැපයුම්වල ආරක්ෂාව තහවුරු කිරීම සඳහාත් අඛණ්ඩ සාකච්ඡා සහ රාජ්‍යතාන්ත්‍රික විසඳුම්වල පවතින අවශ්‍යතාවය පිළිබඳව ෂෙයික් තමීම් මහතා එහිදී අවධාරණය කළේය.
කටාර් රාජ්‍යය ඉරානය සහ එක්සත් ජනපදය අතර මැදිහත්කරු ලෙස කටයුතු කරමින් සිටින අතර, තෙහෙරාන් පාලනය කටාර් මැදිහත්කරුවන් හරහා වොෂිංටනය වෙත සිය යෝජනා යොමු කරමින් සිටියි.