සවුදි අරාබියේදී මරණ දඬුවමට ලක්ව සිටින අනෝජන් සිවරාසා නැමැති ශ්‍රී ලාංකික තරුණයා නිදහස් කරගැනීමට මැදිහත් වන ලෙස ඉල්ලා ශ්‍රී ලංකාවේ ප්‍රදේශ කිහිපයක විරෝධතා සහ අත්සන් ලබාගැනීමේ ව්‍යාපාර සංවිධානය කර තිබුණි.
හැටන් නගරයේ මල්ලියප්පු හන්දියේදී විරෝධතාවක් පැවැති අතර, අනෝජන්ගේ උපන්ගම වන අම්පාර නට්පිටිමුනෙයි ප්‍රදේශයේදී අත්සන් ලබාගැනීමේ ව්‍යාපාරයක් ආරම්භ කරන ලදී.
ඔහු නිදහස් කරගැනීම සඳහා සුදුසු රාජ්‍ය තාන්ත්‍රික පියවර ගන්නා ලෙස රජයෙන් ඉල්ලා සිටින මෙම පෙත්සම විදේශ කටයුතු අමාත්‍යාංශය වෙත භාරදීමට නියමිත බව සංවිධායකයෝ පැවසූහ.
සවුදි අරාබියේ රැකියාවක නිරතව සිටියදී සිවරාසා විසින් සමාජ මාධ්‍ය වෙත එක්කරන ලදැයි කියන සටහනක් මගින් ඉස්ලාම් දහමට සහ මුහම්මද් නබිනායකතුමාට අපහාස වූ බවට එල්ල වූ චෝදනාව මෙම නඩුවට හේතු වී ඇත. ශ්‍රී ලංකාවේ ආගමික කණ්ඩායම් අතර අන්තර්ජාලය ඔස්සේ ඇති වූ මතභේදයක් අතරතුර මෙම සටහන තබා ඇති බව ඔහුගේ පවුලේ අය පවසති.
පසුගිය ජූලි 15 වන දින සවුදි අධිකරණයක් මගින් ඔහුට වසර පහක සිරදඬුවමක් සහ සවුදි රියාල් මිලියන තුනක දඩයක් නියම කරන ලදී.
ශ්‍රී ලංකා විදේශ කටයුතු අමාත්‍යාංශයේ සහාය ඇතිව ඔහුගේ නීතිඥවරයා දඬුවම ලිහිල් කරගැනීම සඳහා ඇපෑලක් (අභියාචනයක්) ඉදිරිපත් කළේය. කෙසේ වෙතත්, එම දඬුවම මරණ දඬුවම දක්වා ඉහළ නංවා ඇති බවට පසුව තමන්ට දැනුම් දුන් බව ඔහුගේ පවුලේ අය පවසති.
විපක්ෂයේ පාර්ලිමේන්තු මන්ත්‍රීවරුන් සහ හිටපු මන්ත්‍රීවරුන් කිහිපදෙනෙකුම අනෝජන් නිදහස් කරගැනීම තහවුරු කිරීම සඳහා මැදිහත් වන ලෙස රජයෙන් ඉල්ලා සිටින අතර, මේ සම්බන්ධයෙන් අවශ්‍ය පියවර මේ වන විටත් ගෙන ඇති බව රජය නිවේදනය කර ඇත.